Hum Apni Hasrat e Dil

Hum apni hasrat-e-dil ko mitane aaye hain Hum apni dil ki lagi ko bujhane aaye hain

Dil-e-hazein ko tasalli dilane aaye hain Gham-e-firaq ko dil se mitane aaye hain

Kareem hain woh nigah-e-karam se dekhenge Hai daagh daagh dil apna dikhane aaye hain

Gham-o-alam yeh mita denge shaad kar denge Hum apne gham ka qaziya chukane aaye hain

Huzoor bahr-e-Khuda dastaan-e-gham sun lein Gham-e-firaq ka qissa sunane aaye hain

Nigah-e-lutf-o-karam hogi aur phir hogi Ke zakhm-e-dil pe yeh marham lagane aaye hain

Fakeer aap ke dar ke hain hum kahan jayen Tumhare koocha mein dhooni ramane aaye hain

Madinah hum se fakeer aake laut jayenge Dar-e-Huzoor pe bistar jamane aaye hain

Khuda ne ghaib diya hai unhein hai sab roshan Jo khatre dil hi mein chupne chupaane aaye hain

Khule gi mere bhi dil ki gali ke jaan-e-jinan Chaman mein phool karam ke khilane aaye hain

Kitab-e-Hazrat-e-Musa mein wasf hain un ke Kitab-e-Isa mein un ke fasane aaye hain

Unhi ki naat ke naghme Zaboor se sun lo Zaban-e-Quran pe un ke tarane aaye hain

Daba nahi woh falak se buland-o-bala hai Teh-e-zameen jise Sarwar dabane aaye hain

Naseeb jaag utha us ka chain se soya Woh jis ko qabr mein Sarwar sulane aaye hain

Ajab karam hai ke khud mujrimon ke haami hain Gunahgaron ki bakhshish karane aaye hain

Sabhi rusul ne kaha izhaboo ila ghairi Ana laha ka yeh muzda sunane aaye hain

Zaban-e-ambiya par aaj nafsi nafsi hai Magar Huzoor shafa'at ki thane aaye hain

Kisi ghareeb ke palle pe waqt-e-wazn-e-amal Bharam karam se yeh us ka banane aaye hain

Woh parcha jis mein likha tha durood us ne kabhi Yeh us se nekiyan us ki barhane aaye hain

Khuda se karte hue arz Rabbi sallim-hu Sirat par yeh kisi ko chalane aaye hain

Instant Access to Thousands of Lyrics - Tap to Install!

Zaban jo dekhe hai sookhi hui to bahr-e-karam Kisi ko hauz pe sharbat pilane aaye hain

Hawa hai hukum kisi ko ke naar mein jaye Yeh sun ke daur ke us ko churane aaye hain

Ilahi door hon Najdi Hijaz se jaldi Hijaziyon ko yeh mauzi satane aaye hain

Naseeb tera chamak utha dekh to Noori Arab ke chand lahad ke sarhane aaye hain