Har Sheh Mein Hai Noor

Har shay mein hai noor-e-rukh-e-taabaan-e-Muhammad Har phool mein khushboo-e-gulistaan-e-Muhammad

Allah ne Mehboob ko be-misl banaya Mumkin hi nahi ho koi hum-shaan-e-Muhammad

Makhlooq ko maloom ho kya un ki haqeeqat Rabb-e-Azz-o-Jal jaanta hai shaan-e-Muhammad

Aasakta hai kab hum se ganwaron ko adab woh Jaisa ke adab karte thay yaaraan-e-Muhammad

Download Lyrics & Access Offline - Install Our App Now!

Seena hai wohi jis mein Nabi ki ho mohabbat Hai aankh wohi jo ke hai joyaan-e-Muhammad

Woh dil hi nahi jo na jhuke sooye Madinah Woh sar hi nahi jo na ho qurban-e-Muhammad

Aada ki shaqawat ke huye Aap ke munkir Aur sang-o-shajar tabe-e-farmaan-e-Muhammad

Mehboob-e-Khuda haakim-e-makhlooq-e-Ilahi Makhlooq-e-Khuda tabe-e-farmaan-e-Muhammad

Tafseer ne LAULAAKA LAMAA ki yeh pukara Woh kaun hai jis par nahi ehsaan-e-Muhammad

Rehta hai falak jis ke tawafon mein shab-o-roz Wallah woh hai gumbad-e-aiwaan-e-Muhammad

Ushaq samajhte hain ise gulshan-e-jannat Kehte hain jise log bayabaan-e-Muhammad

Chalta hai jo zaair toh yeh kehte hain farishtay Dekho woh chala aata hai mehman-e-Muhammad

Sheron pe sharaf rakhte hain darbaar ke kuttay Shahon se bhi barh kar hain gadayaan-e-Muhammad

Laasha mera Taiba ke bayabaan mein para ho Aur rooh bane bulbul-e-bostaan-e-Muhammad

Kya poochte ho mujh se Nakeerain lahad mein Lo dekh lo dil cheer ke armaan-e-Muhammad

Takraunga sar takhta-e-marqad se lahad mein Yaad aayega jis waqt bayabaan-e-Muhammad

Kyun un ke ghulamon ko ho dar hashr-o-lahad ka Haathon mein hain thaame huye daaman-e-Muhammad

Qaidy ko chura deta hai ek un ka ishara Mujrim ko chupa lete hain daaman-e-Muhammad

Ya Rabb yeh tamanna hai ke ta-hashr kahin par Chhoote na mere haath se daaman-e-Muhammad

Pehle hi Khuda hukm qayamat mein yeh de ga Jannat mein chale jayen gadayaan-e-Muhammad

Hum jayenge Firdaus mein Rizwan se yeh keh kar Roko na hamain hum hain ghulaaman-e-Muhammad

Tauseef-o-sana likhe Jameel Rizvi kya Jab Saani-e-Mutlaq hai sana-khwaan-e-Muhammad