Gunahon Ki Nahi Jaati Hai Adat

Gunahon ki nahi jaati hai aadat Ya RasulAllah Tumhein ab kuch karo mah-e-risalat Ya RasulAllah

Gunahon se mujhe ho jaaye nafrat Ya RasulAllah Nikal jaaye buri har ek khaslat Ya RasulAllah

Gunaah lamha ba lamha haaye! ab barhte hi jaate hain Nahi par is pe haaye kuch nadamat Ya RasulAllah

Gunaah kar kar ke haaye! ho gaya dil sakht patthar se Karun kis se kahan jaakar shikayat Ya RasulAllah

Main bachna chahta hun haaye! phir bhi bach nahi paata Gunahon ki pari hai aisi aadat Ya RasulAllah

Kamar aamal-e-bad ne haaye! meri tor kar rakh di Tabahi se bachalo jaan-e-rahmat Ya RasulAllah

No Internet? No Problem! Get the App for Offline Lyrics!

Mere munh ki siyahi se andheri raat sharmaye Mera chehra ho taaban noor-e-izzat Ya RasulAllah

Bawaqt-e-naz’a Aaqa ho na jaaun main kahin barbaad Mera iman rakh lena salamat Ya RasulAllah

Tere Rab ki qasam main layak-e-naar-e-Jahannam hun Bacha sakti hai bas teri shafa’at Ya RasulAllah

Yahan jaise hamari aib poshi aap karte hain Wahan bhi aap rakh leeje ga izzat Ya RasulAllah

Fasad-e-nafs-e-zalim se bachalo azpaye Shaikhain Karo shaitan se meri hifazat Ya RasulAllah

Sahi jaati nahi hain sakhtiyan sakraat ki Sarkar! Sar-e-baalin ab aawo jaan-e-rahmat Ya RasulAllah

Mera yeh khwab ho jaaye Shaha sharminda-e-ta’beer Madine mein piyun jaam-e-shahadat Ya RasulAllah

Mere dil se hawas duniya ki daulat ki nikal jaaye Ata kardo mujhe bas apni ulfat Ya RasulAllah

Mere aansu na hon barbaad duniya ki mohabbat mein Rulaaye bas mujhe teri mohabbat Ya RasulAllah

Phansa jaata hai duniya ki mohabbat mein dil-e-Attar Karo Attar se yeh door aafat Ya RasulAllah