Gham e Furqat Rulaye

غمِ فُرقت رُلائے کاش ہردم یارسولَ اللہ رہوں ہر وقت میں بادیدۂ نَم یارسولَ اللہ

جِگر بھی سَوختہ جاں سَوختہ،دِل چَاک سینہ چَاک مِلے غم اور غم بس آپ کا غم یارسولَ اللہ

نہیں تاجِ شہی کی آرزو بس ایک ارماں ہے نکل جائے تمہارے روبرو دم یارسولَ اللہ

مِرے آقا بہائے اشک جو ہِجرِ مدینہ میں عطا کردو مجھے وہ چشمِ پُر نَم یارسولَ اللہ

ہمارے دل کی ہر دھڑکن سے طیبہ کی صَدا نکلے رہے ذِکرِ مدینہ لب پہ ہر دم یارسولَ اللہ

شہا! چَشمِ کرم ہو تِشنَگانِ دید پر اب تو تمہاری دید کا شَربت پئیں ہم یارسولَ اللہ

گُناہوں کا اندھیرا چھا گیا ہے ہم کمینوں پر خداراہوکرم نُورِ مجسَّم یارسولَ اللہ

جَہاں جاؤں جِدھر جاؤں مدینے کی فَضاپاؤں مِلے لُطفِ حُضوری جَانِ عالَم یارسولَ اللہ

طوافِ خانۂ کعبہ کا تم مُجھ کو شَرَف دے دو پیوں مکّے میں آکر آبِ زم زم یارسولَ اللہ

مدینے جب میں پہنچوں تو کلیجا میرا پھٹ جائے وَہاں رو رو کے اپنا تَوڑ دُوں دَ م یارسولَ اللہ

بقیعِ پاک میں مُجھ کو جگہ سرکار مل جائے طُفیلِ پیرومرشِد غوثِ اعظم یارسولَ اللہ

حُسین ابنِ علی کے واسِطے کردو کرم جِن کا کہ ہے یومِ شہادَت دس محرّ م یارسولَ اللہ

وُہی اُمَّت خطاؤں میں پڑی ہے رات میں جن کے لئے رَویا کئے مانِندِ شَبنَمیارسولَ اللہ

شہا! عطارؔ کا دِل ٹوٹ جائے! کاش دنیا سے رہے گُم آپ کی اُلفت میں ہر دَم یارسولَ اللہ