Fouj Gham Ki Barabar

Fauj-e-gham ki barabar charhai hai Dafi-e-gham tumhari duhai hai

Umr kheilon mein hum ne ganwai hai Umr bhar ki yehi toh kamai hai

Tum ne kab baat koi nabrai hai Tum se jo aarzoo ki bar aayi hai

Tum se har dam umeed-e-bhalai hai Met dijiye jo hum mein burai hai

Tum ne kab aankh hum ko dikhai hai Tum ne kab aankh hum se phirai hai

Tum ko aalam ka maalik kiya us ne Jis ki mamlook saari khudai hai

Kis ke qabzay mein hain yeh zameen-o-zamaan Kis ke qabzay mein pyaray khudai hai

Tu Khuda ka hua aur Khuda tera Teray qabzay mein saari khudai hai

Jab Khuda khud tumhara hua toh phir Kaun si cheez hai jo parai hai

Sab sifaat-e-Khuda ke ho tum mazhar Ek qaboo se bahar khudai hai

Taaj rakha teray sar rafa'na ka Kis qadar teri izzat barhai hai

Anbiya ko rasai mili tum tak Bas tumhari Khuda tak rasai hai

Az zameen ta falak jin-o-ins-o-malak Jis ko dekho tumhara fadai hai

Rashk-e-sultan hai woh gada jis ne Teray koochay mein dhooni ramai hai

Meri taqdeer kar do bhali tum ne Qudrat-e-mehv-o-isbaat payi hai

Mera berha kinaray lagay pyaray Nooh ki naao kis ne tarai hai

Aag ko baagh kis ne kiya pyaray Tum ne tum ne hi qudrat yeh payi hai

Meray dil ki lagi bhi bujha dijiye Naar-e-Namrood kis ne bujhai hai

Sharar afshaniyan kis ki hain ishq ki Aag seenay mein jis ne lagai hai

Kaash woh hashr ke din kahein mujh se Naar-e-dozakh se tujh ko rihai hai

Khushboo-e-zulf se koochay mehkay hain Kaisay phoolon mein Shaha basai hai

Pyaray khushboo tumharay paseenay ki Khuld ke phoolon se bhi sawai hai

Baat woh itar-e-firdous mein bhi nahi Teray malboos ne jo sunghai hai

Is Raza par ho Maula raza-e-Haq Raah jis ne tumhari jalai hai

Nakhuda ba-Khuda aao bahr-e-Khuda Meri kashti tabahi mein aayi hai

Hain yeh sadmay teri hi furqat ke Roz afzoon yeh dard-e-judai hai

Taibah jaaun wahan se na wapas aaun Meray jee mein toh ab yeh samai hai

Get Lyrics On-The-Go! Download Our App Now!

Mar raha hoon tum aa jao jee uthoon Sharbat-e-deed meri dawai hai

Shauq-e-deedar-e-Noori mein ae Noori Rooh khinch kar ab aankhon mein aayi hai