Dilon Ko Yahi Zindagi

Dilon ko yahi zindagi bakhshta hai Tera dard-e-ulfat hi dil ki dawa hai

Why Screenshot When You Can Download? Get the App for Efficient Storage!

Gulistan-e-dunya ka kya zikr Aqa Ke Toti tera Sidra par bolta hai

Mareez-e-ma'asi ko le chal Madinah Madinah hi isyan ka dar-ul-shifa hai

Jo wasil hai tum tak to wasil hai Haq tak Jo tum se phira hai woh Haq se phira hai

Namaz aur rozay zakat aur hajj sab Hain maqbool sab jab tumhari wila hai

Amal sab akarat tumhare adu ke Ke irshad-e-Rabbi ja'alna haba hai

Mohabbat tumhari mohabbat Khuda ki Adawat tumhari Khuda se dagha hai

Woh kaisi hi jheele mashaqqat ada mein Ada kuch nahi hai woh sab kuch qaza hai

Mohabbat tumhari hai imaan ki jaan Agar yeh nahi hai to eeman hawa hai

Kare lakh da'waye imaan dushman Munafiq ka da'waye eeman dagha hai

Khuda par bhi eeman usi ko hai hasil Jisay jaan-e-imaan tujh se wila hai

Khuda ke yahan hai sar afraz itna Teri bargah mein jo jitna jhuka hai

Aghisna Habib-al-Ilahi aghisna Tabahi mein beda hamara phansa hai

Yeh sach hai bad-a'amaliyon hi ne apni Hamein roz-e-bad yeh dikhaya shaha hai

Bohat naam lewa hue qatl-o-gharat Khabar kya nahi tum se kya kuch chupa hai

Tasawwur mein bhi jo na thay woh mazalim Hue aur abhi tak wahi silsila hai

Na dekha tha jo chashm-e-gardoon ne ab tak Tere bandon ne woh sitam ab saha hai

Chhinay maal-o-daulat hue qatl-o-gharat Hazaron ka namoos loota gaya hai

Lakho kiye thanday saffakiyon se Magar zalim ab tak bhi garma raha hai

Jo Haq chahta hai yeh woh chahtay hain Jo yeh chahtay hain woh Haq chahta hai

Magar Maula ab to saza pachukay hum Karam kijiye ab yahi iltija hai

Nekokar banday hi kya hain tumhare Yeh badkar bhi aap hi ka shaha hai

Na kijiye nazar is ki badkariyon par Karam kijiye jo shi'ar aap ka hai

Jo pehlay thay Aqa ghulam aaj thahray Ghulam apne Aqa ka Aqa bana hai

Wa ma yantiqu anil hawa se hai roshan Zaban-e-muqaddas pe Haq bolta hai

Inhein ki rasai hai zaat-e-Khuda tak Siwa un ke koi bhi us tak rasa hai

Do-alam ko kardon main is sar pe sadqay Nisar-e-Madinah jo sar ho chuka hai

Agarcha hai Makkah ki azmat musallam Magar mera dil Taibah hi par fida hai

Hai meraj-e-qismat hazoori yahan ki Hamein aap ka roza Arsh-e-Ula hai

Neko kar hai aap ka bad hai kis ka Woh bhi aap ka hai jo bad hai bura hai

Kahan tak sahein hum mukhalif ke ta'nay Khabar lijiye waqt sabr-azma hai

Muqaddar ke tum ho muqaddar tumhara Jo marzi tumhari woh qadr-o-qaza hai

Khuda ki jo marzi woh marzi tumhari Jo marzi tumhari Khuda ki raza hai

Hai Allah ke hath mein hath is ka Tere hath mein hath jis ne diya hai

Ana Qasimun se hai roshan jahan mein Jisay jo mila woh tumhara diya hai

Habib-e-Khuda hai yahan jalwa farma Yeh gumbad nahi burj-e-Arsh-e-Khuda hai

Bataqdeer-e-Qadir muqaddar woh paya Ke marzi hi goya qadr aur qaza hai

Yahan bheek lenay na kyun aaye dunya Shahanshah-e-alam ki daulat sara hai

Khuda hi ki qadr us ne har giz na jaani Tere rutbay mein jis ko choon-o-chara hai

Na ahl-e-nazar ka banay sajda-gah kyun Jahan naqsh-e-paye Habib-e-Khuda hai

Isi dar ka mohtaj hai sara alam Isi dar se palta palay ga pala hai

Yeh kon-o-makan yeh zameen-o-zaman sab Banay teri khatir tu wajh-e-bina hai

Banaya tujhay aisa Khaliq ne teray Ke zaat-e-Khuda ka tu hi aaina hai

Banaya tumhein apna mazhar Khuda ne Jahanon ko mazhar tumhara kiya hai

Yeh chahat hai mehboob teri Khuda ko Jo tu chahay woh bhi wahi chahta hai

Kuch aisa sanwara hai tujh ko Khuda ne Ke tu hi khudai ka dulha bana hai

Tumhare hi dam ki hain sari baharein Tumhare hi dam se yeh nashonuma hai

Tumhara hi rang aur tumhari hi bo to Hai in phoolon mein warna phir aur kya hai

Chaman hona sairab-o-shadab hona Yeh phal phool lagna tumhari ata hai

Isi dam se abad saray jahan hain Isi dam se sara wajood-o-bina hai

Hai zer-e-nageen tere mulk-e-Ilahi Tu hi Shah-e-wala-e-qasr-e-Dana hai

Tu woh tajwar hai ke taj-e-rafa'na Tere farq-e-aqdas pe Haq ne dhara hai

Mah-o-khor chamaktay damaktay hi na yun Yeh teri chamak hai yeh teri ziya hai

Sitaron ki ankhon mein hai noor kis ka Tumhari chamak hai tumhari ziya hai