Dil Mein Utarte Harf Se Mujhko Mila Pata Tera

دل میں اترتے حرف سے مجھ کو ملا پتا ترا معجزه حسن صوت کا ، زمزمه صدا ترا

میرا کمال فن , ترے حسن کلام کا غلام بات تھی جاں فزا تری ، لہجہ تھا دل ربا ترا

جاں تری سربر جمال دل ترا آئینہ مثال تجھ کو ترے عدو نے بھی دیکھا تو ہو گیا ترا

اے مرے شاہ شرق و غرب نانِ جویں غذا تری اے مرے بوریا نشیں سارا جہاں گدا ترا

سنگ زنوں میں گھر کے بھی تو نے انہیں دعا ہی دی دشت بلا سے بارہا ، گزرا ہے قافلہ ترا

Stop Wasting Storage - Download Lyrics in Lightweight Text Format!

کوئی نہیں تری نظیر روز ازل سے آج تک تا بہ ابد نہیں مثیل ، کوئی ترے سوا ، ترا

یوں تو ، تری رسائیاں فرش سے عرش تک محیط میں نے تو اپنے دل میں بھی پایا ہے نقش پا ترا

میرا تو کائنات میں تیرے سوا کوئی نہیں ارض تری ، سما ترے، بندے ترے، خدا ترا

آتے ہوئے دنوں سے بھی مجھ کو کوئی خطر نہیں ماضی و حال میں بھی جب پورا ہوا کہا ترا

دور سہی دیار نور ، چور ہی مرا شعور تو مرا حوصلہ تو دیکھ میں بھی ہوں مبتلا ترا