Dil Mein Ho Yaad Teri

Dil mein ho yaad teri goshah-e-tanhai ho Phir to khalwat mein ajab anjuman aarai ho

Aastana pe tere sar ho ajal aayi ho Aur ae jaan-e-jahan tu bhi tamashai ho

Khaak-e-pamaal gharibon ko na kyun zinda kare Jis ke daaman ki hawa baad-e-masihai ho

Us ki qismat pe fida takht-e-shahi ki rahat Khaak-e-Taiba pe jise chain ki neend aayi ho

Taaj walon ki ye khwahish hai ke un ke dar par Hum ko hasil sharaf-e-nasiya farsai ho

Ek jhalak dekhne ki taab nahin aalam ko Woh agar jalwah karen kaun tamashai ho

More Lyrics, Less Storage - Install the App and Ditch the Screenshots!

Aaj jo aib kisi par nahin khulne dete Kab woh chahenge meri hashr mein ruswai ho

Kyun karen bazm-e-shabistan-e-jinan ki khwahish Jalwah-e-Yaar jo sham-e-shab-e-tanhai ho

Khil'at-e-maghfirat us ke liye rahmat laye Jis ne khaak-e-dar-e-Shah jaye kafan payi ho

Yehi manzoor tha qudrat ko ke saayah na bane Aise yakta ke liye aisi hi yaktai ho

Zikr-e-khuddam nahin mujh ko bata dein dushman Koi nemat bhi kisi aur se gar payi ho

Jab uthe dast-e-ajal se meri hasti ka hijaab Kaash us pardah ke andar teri zebai ho

Dekhein jaan bakhshi-e-lab ko to kahein Khizr-o-Masih Kyun mare koi agar aisi masihai ho

Kabhi aisa na hua un ke karam ke sadqe Haath ke phailne se pehle na bhek aayi ho

Band jab khwab-e-ajal se hon Hassan ki aankhein Us ki nazron mein tera jalwah-e-zebai ho