Dil Kehta Hai Har Waqt

Dil kehta hai har waqt sifat un ki likha kar Kehti hai zabaan naat-e-Muhammad ki padha kar

Is mehfil-e-milaad mein ae bandah-e-sarkar Jab aaye durood us shah-e-aalam pe padha kar

Khaali kabhi phera hi nahin apne gada ko Ae saailo maango to zara haath utha kar

Khud apne bhikari ki bhara karte hain jholi Khud kehte hain Ya Rabb mere mangta ka bhala kar

A’da se jafa par ho jafa aur yeh dua dein Ya Rabb unhein imaan ki to aankh ata kar

Kuffar-e-bad-atwaar se padhwate hain kalma Ik chashni-e-lazzat-e-deedar chakha kar

Ae abr-e-karam baarish-e-rehmat teri ho jaaye Ho jaayein gunahgaar abhi paak naha kar

Kya door hai sarkar-e-Madinah ke karam se Thodi si jagah dein humein Taibah mein bula kar

Gar Hind mein marta hai koi aashiq-e-saadiq Le jaate hain Taibah mein malak us ko utha kar

Behkata hai yun nafs ke ghar chhod na apna Imaan yeh kehta hai Madine mein raha kar

Ae baad-e-saba itna karam behr-e-Khuda kar Le ja tu Madine ko meri khaak uda kar

Jo khuld na chahenge Madine ke ewaz mein Le jaayenge Rizwan unhein jannat mein mana kar

Hoga na asar hum pe ke hum abd-e-Nabi hain Haan aatish-e-dozakh humein dekhe to jala kar

Kya mehar-e-qayamat humein dikhlayega tezi Sarkar rakhenge humein daaman mein chhupa kar

Mujrim sahi badkaar sahi par hai yaqeen yeh Hum khuld mein jaayenge ke Maula ke hain chaakar

Hai naazon ki paali hui yeh ummat-e-aasi Maula yeh kahenge ke riha is ko Khuda kar

Tu hashr mein Allah Nabi se yeh kahega Mehboob jise chahe tu dozakh se riha kar

Hai kaun woh daulat jo na di un ko Khuda ne Woh kaun si sheh hai jo rakhi un se chhupa kar

Mukhtar bana kar unhein farmaya Khuda ne Jo chahe na de aur jise jo chahe ata kar

Yeh izzat-o-rif’at ke har ik sheh pe Khuda ne Naam un ka likha naam se hai apne mila kar

Allah ne di tere ghulamon ko yeh quwwat Murdon ko jila dete hain lab apne hila kar

Aalam ki khabar rakhte hain gar woh to ajab kya Bheja hai Khuda ne unhein har ilm sikha kar

Taleem di ik naam ko Jibreel-e-Ameen ne Aalam kiya Allah ne khud un ko padha kar

Aajana madad ke liye ae mah-e-Madinah Ahbaab chalein qabr mein jab mujh ko sula kar

Ik jaam-e-mai-e-ishq ka bandah ko pila kar Ya shah-e-Arab apni mohabbat mein fana kar

Yeh hukum mila rooh-e-Ameen ko shab-e-mi’raj Jibreel abhi la mere pyaare ko bula kar

Haazir dar-e-aqdas pe hue rooh-e-mu’azzam Aur arz yeh ki rehmat-e-aalam se jaga kar

Haazir hai Buraq aur hai taalib ka taqaza Hai hukum ke laao mere mehboob ko ja kar

Dulha bane taiyaar hue sahib-e-mi’raj Aur le chale Jibreel sawari ko saja kar

Sidrah pe thake baazu-e-Jibreel to aage Rafraf ne unhein chhod diya arsh pe la kar

Tanhai se khaif hue jab Shah to Rab ne Taskeen di Siddiq ki aawaaz suna kar

Phir arsh se paar apne qareen un ko bulaya Sab kuch diya mehboob ko deedar dikha kar

Mehboob ne ki arz ke Maula meri ummat Tu aaj ki shab naar-e-jahannam se riha kar

Free Up Space - Get Lyrics Without Bulky Screenshots!

Jaan-e-dojahan rehmat-e-aalam pe ho qurbaan Aaya shab-e-mi’raj ghulamon ko chhada kar

Woh roz Jameel-e-Rizwi ko ho muyassar Kuch naat padhe rauzah-e-purnoor pe aakar