Dil Kehta Hai Har Waqt

دِل کہتا ہے ہر وقت صفت اُن کی لکھا کر کہتی ہے زباں نعت محمد کی پڑھا کر

اس محفل میلاد میں اے بندۂ سرکار جب آئے دُرود اس شہِ عالم پہ پڑھا کر

خالی کبھی پھیرا ہی نہیں اپنے گدا کو اے سائلو مانگو تو ذرا ہاتھ اُٹھا کر

خود اپنے بھکاری کی بھرا کرتے ہیں جھولی خود کہتے ہیں یارب مرے منگتا کا بھلا کر

اَعدا سے جفا پر ہو جفا اور یہ دعا دیں یارب انہیں ایمان کی تو آنکھ عطا کر

کفارِ بداَطوار سے پڑھواتے ہیں کلمہ اِک چاشنیٔ لذتِ دیدار چکھا کر

اے اَبر کرم بارشِ رحمت تری ہوجائے ہو جائیں گنہگار ابھی پاک نہا کر

کیا دُور ہے سرکار مَدینہ کے کرم سے تھوڑی سی جگہ دیں ہمیں طیبہ میں بلا کر

گر ہند میں مرتا ہے کوئی عاشق صادق لے جاتے ہیں طیبہ میں مَلک اس کو اُٹھا کر

بہکاتا ہے یوں نفس کہ گھر چھوڑ نہ اپنا اِیمان یہ کہتا ہے مَدینے میں رہا کر

اے بادِ صبا اِتنا کرم بہرِ خدا کر لے جا تو مَدینے کو مری خاک اُڑا کر

جو خلد نہ چاہیں گے مَدینے کے عوض میں لے جائیں گے رِضواں اُنہیں جنت میں منا کر

ہوگا نہ اثر ہم پہ کہ ہم عبد نبی ہیں ہاں آتش دوزخ ہمیں دیکھے تو جلا کر

کیا مہر قیامت ہمیں دِکھلائے گا تیزی سرکار رکھیں گے ہمیں دامن میں چھپا کر

مجرم سہی بدکار سہی پر ہے یقیں یہ ہم خلد میں جائیں گے کہ مولیٰ کے ہیں چاکر

ہے نازوں کی پالی ہوئی یہ اُمتِ عاصی مولیٰ یہ کہیں گے کہ رِہا اس کو خدا کر

تو حشر میں اللہ نبی سے یہ کہے گا محبوب جسے چاہے تو دوزخ سے رِہا کر

ہے کون وہ دولت جو نہ دی اُن کو خدا نے وہ کون سی شے ہے جو رکھی اُن سے چھپا کر

مختار بنا کر انہیں فرمایا خدا نے جو چاہے نہ دے اور جسے جو چاہے عطا کر

یہ عزت و رِفعت کہ ہر اِک شے پہ خدا نے نام اُن کا لکھا نام سے ہے اپنے ملا کر

اللہ نے دی تیرے غلاموں کو یہ قوت مردوں کو جلا دیتے ہیں لب اپنے ہلا کر

عالم کی خبر رکھتے ہیں گر وہ تو عجب کیا بھیجا ہے خدا نے انہیں ہر علم سکھا کر

تعلیم دی اِک نام کو جبریلِ امیں نے عالم کیا اللہ نے خود ان کو پڑھا کر

آجانا مَدد کے لیے اے مَاہِ مَدینہ اَحباب چلیں قبر میں جب مجھ کو سلا کر

اِک جام مئے عشق کا بندہ کو پلا کر یا شاہِ عرب اپنی محبت میں فنا کر

یہ حکم ملا رُوحِ امیں کو شب معراج جبریل ابھی لا مرے پیارے کو بلا کر

حاضر درِ اَقدس پہ ہوئے رُوحِ مُعَظَّم اور عرض یہ کی رحمت عالم سے جگا کر

حاضر ہے براق اور ہے طالب کا تقاضا ہے حکم کہ لاؤ مرے محبوب کو جا کر

دولہا بنے تیار ہوئے صاحب معراج اور لے چلے جبریل سواری کو سجا کر

سدرہ پہ تھکے بازوئے جبریل تو آگے رَفرف نے انہیں چھوڑ دیا عرش پہ لا کر

تنہائی سے خائف ہوئے جب شاہ تو رب نے تسکین دی صدیق کی آواز سُنا کر

پھر عرش سے پار اپنے قریں ان کو بلایا سب کچھ دیا محبوب کو دِیدار دکھا کر

محبوب نے کی عرض کہ مولیٰ مری امت تو آج کی شب نارِ جہنم سے رہا کر

جانِ دوجہاں رحمت عالم پہ ہو قرباں آیا شب معراج غلاموں کو چھڑا کر

وہ روز جمیلؔ رضوی کو ہو مُیَسَّر کچھ نعت پڑھے روضہ پُرنور پہ آکر