Chasham e Dil Chahe Jo

Chashm-e-dil chaahe jo anwaar se rabt Rakkhe khaak-e-dar-e-dildaar se rabt

Un ki ne'mat ka talabgaar se mail Un ki rehmat ka gunahgaar se rabt

Dasht-e-Taibah ki jo dekh aayain bahaar Ho anadil ko na gulzaar se rabt

Ya Khuda dil na mile duniya se Na ho aaina ko zangaar se rabt

Nafs se mail na karna ae dil Qahr hai aise sitamgaar se rabt

Dil-e-Najdi mein ho kyun hubb-e-Huzoor Zulmaton ko nahin anwaar se rabt

Talkhi-e-naz'a se us ko kya kaam Ho jise la'l-e-shakar-baar se rabt

Get Lyrics On-The-Go! Download Our App Now!

Khaak-e-Taibah ki agar mil jaaye Aap sehat kare bimaar se rabt

Un ke daaman-e-gohar-baar ko hai Kaasa-e-dast-e-talabgaar se rabt

Kal hai ijlaas ka din aur hamain Mail amla se na darbaar se rabt

Umr yun un ki gali mein guzre Zarra zarra se barhe pyaar se rabt

Sar-e-shoreeda ko ho dar se mail Kamar-e-khasta ko deewar se rabt

Ae Hasan khair hai kya karte ho Yaar ko chor kar aghyaar se rabt