Chasham e Dil Chahe Jo

چشمِ دل چاہے جو اَنوار سے ربط رکھے خاکِ دَرِ دِلدار سے ربط

ان کی نعمت کا طلبگار سے میل ان کی رحمت کا گنہگار سے ربط

دشت طیبہ کی جو دیکھ آئیں بہار ہو عنادِل کو نہ گلزار سے ربط

یا خدا دِل نہ ملے دنیا سے نہ ہو آئینہ کو زَنگار سے ربط

Never Be Without Your Favorite Lyrics - Get the App for Offline Access!

نفس سے میل نہ کرنا اے دل قہر ہے ایسے ستم گار سے ربط

دِلِ نجدی میں ہو کیوں ُحبِ حضور ظلمتوں کو نہیں اَنوار سے ربط

تلخی نزع سے اس کو کیا کام ہو جسے لعل شکر بار سے ربط

خاک طیبہ کی اگر مل جائے آپ صحت کرے بیمار سے ربط

ان کے دامانِ گہربار کو ہے کاسۂ دست طلبگار سے ربط

کل ہے اِجلاس کا دن اَور ہمیں میل عملہ سے نہ دَربار سے ربط

عمر یوں ان کی گلی میں گزرے ذَرَّہ ذَرَّہ سے بڑھے پیار سے ربط

سرِ شوریدہ کو ہو دَر سے میل کمرِ خستہ کو دِیوار سے ربط

اے حسنؔ خیر ہے کیا کرتے ہو یار کو چھوڑ کر اَغیار سے ربط