Chara Gar Hai Dil

Charah-gar hai dil to ghayal ishq ki talwar ka Kya karoon main le ke phaha marham-e-zangar ka

Ruksh-e-khuld-e-bareen hai dekh kucha yaar ka Haif bulbul ab agar le naam to gulzar ka

Husn ki be-pargi parda hai aankhon ke liye Khud tajalli aap hi parda hai ruye yaar ka

Husn to be-parda hai parda hai apni aankh par Dil ki aankhon se nahin hai parda ruye yaar ka

Ik jhalak ka dekhna aankhon se go mumkin nahin Phir bhi aalam dil se talib hai tere deedar ka

Tere bagh-e-husn ki ronaq ka kya aalam kahoon Aaftab ik zard patta hai tere gulzar ka

Kab chamakta yeh hilal-e-aasman har mah yun Jo na hota is pe partau abru-e-sarkar ka

Jaag uthi soi qismat aur chamak utha naseeb Jab tasawwur mein samaya ruye anwar yaar ka

Hasrat-e-deedar dil mein aur aankhein beh chalein Tu hi wali hai khudaya deedah-e-khoon-bar ka

Bheek apne marham-e-deedar ki kardo ata Chahiye kuch munh bhi karna zakhm-e-daman-dar ka

Kaam nashtar ka kya nasiha nasihat ne teri Cheer dala aur daman zakhm-e-daman-dar ka

Yun hi kuch achha madawa is ka hoga bakhya-gar Chak kar daaloon gareeban zakhm-e-daman-dar ka

Why Screenshot When You Can Download? Get the App for Efficient Storage!

Az sar-e-balin-e-man bar khez ae nadan tabeeb Ho chuka tujh se madawa ishq ke bimar ka

Fitne jo uthe mita dale ravish ne aap ki Kyun na ho dushman bhi qail khoobi-e-raftar ka

Chauqri bhoola buraq-e-bad-pa yeh dekh kar Hai qadam dush-e-saba par is sabak-raftar ka

Koi dam ki der hai aate hain dam ki der hai Ab chamakta hai muqaddar talib-e-deedar ka

Jab gira main be-khudi mein un ke qadmon par gira Kaam to main ne kiya achhe bhale hoshiyar ka

Aablah-pa chal raha hai be-khudi mein sar ke bal Kaam deewana bhi karta hai kabhi hoshiyar ka

Aablon ke sab katore aah khali ho gaye Munh abhi tar bhi na hone paya tha har khar ka

Aable kam-maigi par apni roye raat din Sookh kar kanta hua dekhein badan har khar ka

Wa isi barte pe tha yeh tatta pani wah wah Pyaas kya bujhti dahan bhi tar nahin har khar ka

Paon mein chubhte the pehle ab to dil mein chubhte hain Yaad aata hai mujhe reh reh ke chubhna khar ka

Paon kya main dil mein rakh loon paon jo Taiba ke khar Mujh se shorida ko kya khatka ho nok-e-khar ka

Raah par kante biche hain kanton par chalni hai raah Har qadam hai dil mein khatka is rah-e-pur-khar ka

Khar-e-gul se dahr mein koi chaman khali nahin Yeh Madinah hai ke hai gulshan gul-e-be-khar ka

Gul ho sehra mein to bulbul ke liye sehra chaman Gul na ho gulshan mein to gulshan hai ik ban khar ka

Gul se matlab hai jahan ho andaleeb-e-zaar ko Gul na ho to kya kare bulbul kaho gulzar ka

Phir se ho jaye na aalam mein kahin toofan-e-Nooh Lo ubalta hai samandar apni chashm-e-zaar ka

Dhajiyan ho jaye daman fard-e-asiyan ka meri Hath aa jaye jo gosha daman-e-dildar ka

Kausar-o-tasneem se dil ki lagi bujh jaye gi Main to pyasa hoon kisi ke sharbat-e-deedar ka

Aainah-khanah mein un ke tujh se sadha mehr hain Mehr kis munh se kiya hai hausla-e-deedar ka

Jalwah-gah-e-khas ka aalam bataye koi kya Mehr-e-aalam-tab hai zarrah harim-e-yar ka

Haft kishwar hi nahin chaudah tabaq roshan kiye Arsh-o-kursi lamakan par bhi hai jalwah-e-yar ka

Zard ru kyun ho gaya khurshid-e-taban sach bata Dekh paya jalwah kya is matla-e-anwar ka

Haft kishwar hi nahin chaudah tabaq zer-e-nageen Arsh-o-kursi lamakan kis ka mere sarkar ka

Yeh mah-o-khor yeh sitare charkh ke fanus hain Shama-e-roshan mein hai jalwah tere rukhsar ka

Marqad-e-Noori pe roshan hai yeh la’al-e-shab-charagh Ya chamakta hai sitara aap ki peezar ka