Koi Kiya Jane Jo Tum Ho

Koi kya jaane jo tum ho Khuda hi jaane kya tum ho Khuda toh keh nahin sakte magar shan-e-Khuda tum ho

Nabiyon mein ho tum aise Nabi-ul-Anbiya tum ho Haseenon mein tum aise ho ke mehboob-e-Khuda tum ho

Tumhara husn aisa hai ke mehboob-e-Khuda tum ho Mah-e-kamil kare kasb-e-ziya woh mah-e-liqa tum ho

Ulu-e-martabat pyare tumhara sab pe roshan hai Makeen-e-lamakann tum ho Shah-e-Arsh-e-ula tum ho

Tumhari hamd farmayi Khuda ne apne Quran mein Muhammad aur Mumajjad Mustafa-o-Mujtaba tum ho

Jo sab se pichla ho phir us ka pichla ho nahin sakta Ke woh pichla nahin agla hua us se wara tum ho

Tumhin se fath farmayi tumhin par khatm farmayi Rusul ki ibtida tum ho Nabi ki intiha tum ho

Khuda ne zaat ka apni tumhin mazhar banaya hai Jo haq ko dekhna chahein toh us ke aayina tum ho

Tumhin batin tumhin zahir tumhin awwal tumhin aakhir Nihan bhi ho ayan bhi mubtada-o-muntaha tum ho

Munawwar kar diya hai aap ke jalwon ne alam ko Mah-o-khursheed ko bakhshi ziya Noor-e-Khuda tum ho

Mita di kufr ki zulmat tumhare ru-e-roshan ne Sawera shirk ka tum ne kiya Shams-ud-Duha tum ho

Jahan tareek tha sara andhera hi andhera tha Tum aaye zulmaten tum se mitin Badr-ud-Duja tum ho

Mira munh kya ke main madh-o-sataish mein zaban kholun Mire Aaqa tum aise ho ke mamdooh-e-Khuda tum ho

Rafa'na se tumhari rif'at bala hui zahir Ke mehbooban-e-Rabb mein sab se aali martaba tum ho

Ulu-e-rutba-e-Sarkar-e-Aali sab pe roshan hai Makeen-e-lamakann tum ho Shah-e-Arsh-e-ula tum ho

Shab-e-Meraj se ay Sayyid-e-kul ho gaya zahir Rusul hain muqtadi saare Imam-ul-Anbiya tum ho

Na hote tum na hote woh ke asl-e-jumla tum hi ho Khabar the woh tumhari mere Maula mubtada tum ho

Tumhare chahne wale ko kuch aisi mohabbat hai Idhar ho jaye woh Maula jidhar Sadr-ul-Wara tum ho

Tumhare chahne wale use mehboob hain saare Kuch is andaaz ke pyare Habib-e-Kibriya tum ho

Tumhare baad paida ho Nabi koi nahin mumkin Nabuwwat khatm hai tum par ke Khatm-ul-Anbiya tum ho

Yeh kya main ne kiya kyun dhoond dala arsa-e-mehshar Hamein maloom tha pyare hamara mudda'a tum ho

Magar aisa na kyun hota ke mehshar mein yeh khulna tha Shafi-e-mujriman pesh-e-Khuda tanha Shaha tum ho

Giraftar-e-bala hazir hue hain toote dil le kar Ke har be-kal ki kal toote dilon ka aasra tum ho

Khabar leeje Khudara mere Maula mujh se be-kas ki Ke har be-kas ke kas be-bas ke bas roohi fida tum ho

Musallat kar diya tum ko Khuda ne apne ghaibon par Nabi Mujtaba tum ho Rasool-e-Murtaza tum ho

Never Be Without Your Favorite Lyrics - Get the App for Offline Access!

Chamak jaye dil-e-Noori tumhare paak jalwon se Mita do zulmaten dil ki mere Noor-ul-Huda tum ho