Ba Khat e Noor Iss Dar Par

Bakhate-noor is dar par likha hai Yeh baab-e-rehmat-e-Rabb-e-Ula hai

Sar-e-khairah jo ab dar par jhuka hai Ada hai umar bhar ki jo qaza hai

Muqabil dar ke yun Kaaba bana hai Yeh qibla hai to tu qibla-numa hai

Dar-e-wala pe ik mela laga hai Ajab us dar ke tukron mein maza hai

Yahan se kab koi khaali phira hai Sakhi Data ki yeh daulat-sara hai

Gada to hai gada jo badshah hai Usay bhi to usi dar se mila hai

Jisay jo kuch mila jis se mila hai Haqeeqat mein woh us dar ki ata hai

Usi sarkar ka mangta hai aalam Gada us dar ka har shah-o-gada hai

Yahan se bheek paatay hain salateen Usi dar se unhein tukra mila hai

Usi dar se palay ga pal raha hai Usi ghar se zamana pal chuka hai

Shab-e-Meraj se zahir hua hai Rusul hain muqtadi to muqtada hai

Khudai ko Khuda ne jo diya hai Usi ghar se usi dar se mila hai

Khuda-e-pak to ghar dar se hai paak Magar yeh dar dar-e-pak-e-Khuda hai

Yahan woh ba-Khuda hai jalwa-farma Jo kashti ka jahan ki na-khuda hai

Shah-e-Arsh-e-astaan Allah Allah Tasawwur se Khuda yaad aa raha hai

Yeh woh mehboob-e-Haq hai jis ki ru’yat Yaqeen mano keh deedar-e-Khuda hai

Yadullah jis ka dast-e-pak thehra Woh bai’at jis ki bai’at ba-Khuda hai

Rami jis ki rami thehri Khuda ki Kitab-e-Allah mein Allah rama hai

Qasam Quran mein jis ki rah-guzar ki Khuda ne yaad ki kya martaba hai

Wohi matloob jis ka har har andaaz Wohi mehboob jis ki har ada hai

Instant Access to Thousands of Lyrics - Tap to Install!

Hawa se paak jis ki zaat-e-qudsi Woh jis ki baat bhi wahy-e-Khuda hai

Nahi kehte hawa-e-nafs se kuch Jo farmayein wohi wahy-e-Khuda hai

Chamak se jin ki roshan hain do aalam Mehak se jis ki har bustaan basa hai

Woh jalwa jis se Haq hai aashkara Woh surat jo jamal-e-Haq-numa hai

Woh yakta aayina zaat-e-Ahad ka Woh mir’aat-e-sifaat-e-Kibriya hai

Woh pyara jis pe Rabb hai aisa pyara Keh us ke pyaray par pyara Khuda hai

Woh jis ka shehar bhi hai aisa pyara Jahan ki raat din se bhi siwa hai

Jahan hai be-thikanon ka thikana Jahan shah-o-gada sab ka thiya hai

Dawa dukh dard ki hai khaak jis ki Ma’asi ka jahan Darul-shifa hai

Karam farmaiye aye Sarwar-e-Deen Jahan mangton ki paiham yeh sada hai

Khazanay apnay de ke tum ko Haq ne Na qasim hi keh maalik kar diya hai

Jisay jo chaho jitna chaho do tum Tumhein mukhtar-e-kul farma diya hai

Do aalam bheek letay hain yahan se Jo jis ke paas hai tera diya hai

Na mangein tum se hum to kis se mangein Hain sab dar band bas yeh dar khula hai

Main dar dar kyun phiron dur-dur sunon kyun Meray Sarwar mera kya sar phira hai

Ata farmatay ho be-mangay sab kuch Yeh mangta tum se tum ko mangta hai

Tumhara milna milna hai Khuda ka Khuda mil jaye to phir kya raha hai

Ata farmaiye apnay karam se Meray Maula jo dil ka mudda’a hai

Yehi Sarkar-e-faiz-asar hai woh Jahan se faiz ka dariya baha hai

Yehein se paatay hain sab apnay matlab Har ik ke wastay yeh dar khula hai

Ba-har lahza ba-har sa’at ba-har dam Dar-e-Sarkar-e-faiz-asar wa hai

Nahi taqseem mein tafreeq kuch bhi Keh dushman bhi yehein ka keh raha hai

Yeh woh dar hai hawa hai woh bhi hazir Jo is Sarkar ka dushman chupa hai

Salam-e-rustai be-gharz neest Woh kya ta’zeem ko hazir hua hai

Aqeeday mein to is ke shirk hai yeh Dikhane ko taqiyya kar liya hai

Jala imaan se hoti hai dil par Woh andha sheesha hai jo be-jala hai

Nahi sheesha nahi woh dil to jis par Khuda ne khatm farma di tawa hai

Na thehray matr-e-Haq ki boond jis par Lehabi kya hai ik chikna ghara hai

Bohat bad-firqay paida ho chukay hain Sabhi ne ik naya mazhab garha hai

Jo mazhab Ahl-e-Sunnat ke ilawa Bana hai woh jahannam ka garha hai

Jama’at par yad-e-rehmat hai Haq ka Juda firqa jahannam mein gira hai

Hai un mein ek firqa sab se badtar Jisay shirk az umoor-e-aamma hai

Nahi jis se koi maujood khaali Koi bhi us ki zad se bach saka hai

Har ik is shirk se thehra jo mushrik Jo hai ya hoga ya aagay hua hai

Sahaba khud Nabi balkeh khud Allah Sabhi par hukm-e-shirk us ne jara hai

Jisay bid’at ki lat itni pari hai Keh Sunnat ko bhi bid’at bolta hai

May-e-bid’at se hai sarshar aisa Keh sab kuch us ko bid’at soojhta hai

Thi itni tund may jis ke nashay mein Keh khud apnay hi ko bhoola hua hai

Yeh khud hai bid’ati mushrik yaqeena Magar Sunni ko bid’i jaanta hai

Hain us ke shirk-o-bid’at ahl-e-gehlay Sarapa jin mein khud dooba hua hai

Yeh aisa is ka hukm-e-shirk-o-bid’at Usay sawan ke andhay ka hara hai

Hai Sunni aayina us ne jo dekha Nazar apna hi chehra aa gaya hai

Usay man ibtada’a to reh gaya yaad Magar man sanna yeh bhoola hua hai

Khud apnay fatwon se hai aap mushrik Na bas mushrik hi yeh mushrik juna hai

Nahi hai baap hi mushrik keh jud bhi Aur us ka jud jahan tak silsila hai

Khuli tanqee’sein mehbooban-e-Haq ki Yeh firqa barmala karta raha hai

Khuli tauheen ki hai khud Khuda ki Keh us ko kizb par qadir kaha hai

Na mumkin hi kaha balkeh yahan tak Barha hai yeh keh waqay keh gaya hai

Na bas ik kizb par hi us ne bas ki Keh jahl-o-zulm-o-sarqa bhi kaha hai

Tumhein Haq ne diye hain woh fazail Keh shirkat in mein hona narawa hai

Mumasil ho nahi sakta tumhara Tumhein woh fazl-e-kul Rabb ne diya hai

Tumhari be-misali is se zahir Keh mehboob-e-Khuda tum ko kiya hai

Muhib kya chahta hai misl-e-mehboob Muhib to be-misali chahta hai

Magar yeh firqa mehboob-e-Khuda ke Karoron misl mumkin maanta hai

Na mumkin hi keh chhay misl waqay Kaha karta kutub mein chaapta hai

Yunhi khatm-e-nubuwwat ka hai mani’ Shafa’at se bhi munkir ho gaya hai

Musalmanon ke dar se lafz maanay Magar ma’nay ka mani’ barmala hai

Jo ma’nay un ke hain ma’thoor ab tak Sarahat se unhein rad kar raha hai

Kahan tak zulm mein is ke ginaun Kahan tak main ginun kya kya baka hai

Nafi jis ilm ki Sarkar se ki Usi ko nass se sheytan kar diya hai

Muheet-e-arz ka sheytan ko jab Yeh nass se ilm saabit maanta hai

Shareek-e-Iblees ko karta hai Haq ka Keh sheytan hi ko yeh Haq jaanta hai

Woh kuch maanay baher surat woh khud hi Bara mushrik bahukm-e-khud bana hai

Majaneen-o-sabi haiwan bahaim Yeh in sab ke liye bhi maanta hai

Nabi ghair-e-Nabi mein farq poocha Batao in mein un mein farq kya hai

Unhein jaisa bataya ilm-e-aqdas Kaha hai ba’z mein takhsees kya hai

Nafi shah se bajah-e-shirk ki bhi Magar phir bhi usi mein mubtala hai

Jo qismat mein likha tha kyun na hota kahein taqdeer ka likha mita hai

Karein lakhon jatan hota hai woh hi Wohi hoga jo qismat mein bada hai

Khayal-e-khar mein istighraq se bad Jo ta’zeem-e-Nabi ko jaanta hai

Agar us ko koi itna kahega Keh woh insaan nahi khasa gadha hai

Bikhar jayenge us par kaisa kaisa Jinhein tahzeeb-e-nau ka idda’a hai

Bayan-e-aib-e-dushman na’at hi hai Keh Quran mein bhi to Tabbat yada hai

Ziya-e-Kaaba se roshan hain aankhein Munawwar qalb kaisa ho gaya hai

Hamari haziri noor-un-ala-noor Keh ba’d-e-Hajj hamein hazir kiya hai

Ziya-e-rauza ka aalam kahoon kya Keh woh to noor-e-Kaaba se siwa hai

Yahan mehboob-e-Rabb hai jalwa-aara Wahan bas ik tajalli ki ziya hai

Hai yeh to wasl se sarsabz dil shaad Woh naar-e-hijr se dil sokhta hai

Mah-o-khur bheek paatay hain yahan se Ziya-e-rauza ka kehna hi kya hai

Faza-e-Taiba ke qurban jaaun Naseem-e-khuld si jis ki hawa hai

Khafeef-o-khush maza be-misl paani Kahein duniya mein aisa kab piya hai

Zameen-e-paak woh jis ko Khuda ne Kitab-e-Allah mein Arzullah kaha hai

Hamein to Taiba hai Jannat se barh kar Jahan mehboob-e-Haq jalwa-numa hai

Qadam hum jaison ke is sarzameen par Karam Sarkar ka hai aur kya hai

Watan ki har suhani subh Noori Yahan ki sham-e-ghurbat par fida hai