Ah Shah e Behar o Bar

Aah! Shah-e-bahr-o-bar! main Madinah chhor aaya Koh-e-gham para sar par, main Madinah chhor aaya

Aah! Masjid-e-Nabvi, haaye Gumbad-e-Khizra Aah! Rauza-e-Anwar, main Madinah chhor aaya

Gham ke chha gaye baadal, dil mein mach gayi halchal Aah! ae mere yawwar! main Madinah chhor aaya

Jab chala tha Taibah ko, thi khushi mere dil ko Aah! ab hai dil-e-muztar! main Madinah chhor aaya

Dil mein beqaraari hai aur giryah taari hai Bah rahi hai chashm-e-tar, main Madinah chhor aaya

Chhup gaya nigahon se, aah! sab Madine ka Dilkash-o-haseen manzar, main Madinah chhor aaya

Qalb paara paara hai, hijr-e-Shah ne maara hai Aah! mere chaara gar! main Madinah chhor aaya

Ab gham-e-Madinah se, chaak chaak seenah hai Kyun kahoon na ro ro kar, main Madinah chhor aaya

Lutf jo hai Taibah mein woh kahan watan mein hai Kya karoon ga ja kar ghar, main Madinah chhor aaya

Laut kar na main aata, kaash! jaan de deta Gir ke khaak-e-Taibah par, main Madinah chhor aaya

Aah! din Madine ke, jald jald guzre the Haaye jald chhuta dar, main Madinah chhor aaya

Din ko bhi suroor aata, shab ko bhi zaroor aata Kya fiza thi kaif aawar, main Madinah chhor aaya

Tha wahan samaan noori, ranj-o-gham se thi doori Aah! noor ke paikar! main Madinah chhor aaya

Waqt-e-hijr jab aaya, phoot phoot kar roya Dardnaak tha manzar, main Madinah chhor aaya

Hijr ka hai sadma aur seenah-o-jigar mere Rakh ke qalb par patthar, main Madinah chhor aaya

No Internet? No Problem! Get the App for Offline Lyrics!

Hijr ke main sadmon se, choor choor zakhmon se Chal raha tha ro ro kar, main Madinah chhor aaya

Jab Madinah chhuta tha gham ka koh toota tha Jaan-o-dil liye muztar main Madinah chhor aaya

Sabz Gumbad aur minar, aah! chhut gaye Sarkar Phir bulaiye Sarwar, main Madinah chhor aaya

Tha gham-e-Madinah mein, furqat-e-Madinah mein Dil mera bahut muztar, main Madinah chhor aaya

Mere haami-o-hamdam! door hon jahan ke gham De do apna gham Sarwar! main Madinah chhor aaya

Dil mein hai pareshani, ho karam ae Sultani Aao khwab mein Sarwar! main Madinah chhor aaya

Dil ki hai ajab haalat, sadma-o-gham-e-furqat Al-firaq ae Sarwar! main Madinah chhor aaya

Chaldiya safeena hai chhut gaya Madinah hai Haaye! kya karoon Sarwar main Madinah chhor aaya

Gham ki ho gaya tasveer, aah! hijr hai taqdeer Chup hua hoon ro ro kar! main Madinah chhor aaya

Door ho gaya Sarkar! aah! ghamzada Attar Jald aaoon phir dar par, main Madinah chhor aaya