Aesi Qudrat Ne Teri Soorat

Aisi qudrat ne teri surat sanwari Ya Rasul Donon aalam ko hui yeh shakal pyari Ya Rasul

Hai chamak tere dur-e-dandan mein jaisi Ya Nabi Motiyon mein kab hai aisi aabdari Ya Rasul

Ae teri rif'at ke tere Rab ne ki tujh ko ata Tajdaran-e-jahan ki tajdari Ya Rasul

Hai kahan madar ko ulfat is qadar farzand se Tujh ko hai ummat ki jitni pasdari Ya Rasul

Khwab-e-ghaflat mein pare din raat hum sote rahe Tum ne ki gham mein hamare ashkbari Ya Rasul

Raat kaati hum ne so kar din guzara lahu mein Tum ne rote rote sari shab guzari Ya Rasul

Waqt-e-paidaish shab-e-mi'raj marqad mein kahin Tum ne ummat ki na chhori ghamgusari Ya Rasul

Instant Access to Thousands of Lyrics - Tap to Install!

Aasiyon ki mulhidon ki mushrik-o-kuffar ki Tum ne ki dunya mein sab ki parda dari Ya Rasul

Haq ke pyare aap aur ummat hai pyari aap ko Is liye Haq ko hui ummat bhi pyari Ya Rasul

Ek qatra ho ata jaam-e-may-e-irfan se Door ho dil se mere ghaflat shi'ari Ya Rasul

Is ko kehte hain mohabbat Haidar-e-Karrar ne Tere sone par namaz-e-asr wari Ya Rasul

Zindagi bhar ba'd-e-murdan roz-e-mahshar tak rahe Tere dar se mujh ko hasil ham-kinari Ya Rasul

Shan-e-rehmat josh par aayi chhuraya qaid se Be-kali ke sath jab harni pukari Ya Rasul

Koi bhi dunya-o-uqba mein nahin pursan-e-haal Aas hai hum aasiyon ko bas tumhari Ya Rasul

Har musibat se bachaya tere naam-e-paak ne Teri rehmat ne meri halat sanwari Ya Rasul

Gar Khuda chahe to uth jaye ga parda qabr se Mar ke bhi dekha karun ga shakal pyari Ya Rasul

Ka'ba-e-dil mein Madinah aur Madinah mein ho tum Mere seene mein bhi hai turbat tumhari Ya Rasul

Is liye ushshaq ke seenon mein ho tum jalwa-gar Sar jhuka kar dekh lein surat tumhari Ya Rasul

Ya Habibullah Ya Ghous-ul-Wara jis dam kaha Najdiyon ke lag gayi dil par katari Ya Rasul

Parti hai dunya mein la'nat hashr mein naar-e-jahim Donon aalam mein Wahabi ki hai khwari Ya Rasul

Hai faqat itni tamanna ae Jameel-e-Qadri Ho teri khalis mohabbat dil mein sari Ya Rasul