Aesa Tujhe Khaliq Ne

Aisa tujhe Khaliq ne tarah-daar banaya Yusuf ko tera talib-e-deedar banaya

Tal'at se zamana ko pur-anwar banaya Nakhat se gali kuchon ko gulzar banaya

Deewaron ko aaina banate hain woh jalwe Aaeeno ko jin jalwon ne deewar banaya

Woh jins kya jis ne jise koi na pooche Us ne hi mera tujh ko kharidar banaya

Ae nazm-e-risalat ke chamakte hue maqta Tu ne hi ise matla-e-anwar banaya

Konain banaye gaye Sarkar ki khatir Konain ki khatir tumhein Sarkar banaya

Kunji tumhein di apne khazano ki Khuda ne Mehboob kiya malik-o-mukhtar banaya

Allah ki rehmat hai ke aise ki yeh qismat Aasi ka tumhein hami-o-ghamkhar banaya

Aaina-e-zaat-e-Ahadi aap hi thehre Woh husn diya aisa tarah-daar banaya

Anwar-e-tajalli se woh kuch hairatein chhayin Sab aaeeno ko pusht-e-badiwar banaya

Aalam ke salateen bhikari hain bhikari Sarkar banaya tumhein Sarkar banaya

Gulzar ko aaina kiya munh ki chamak ne Aaina ko rukhsaar ne gulzar banaya

Yeh lazzat-e-paboos ke pathar ne jigar mein Naqsh-e-qadam-e-Sayyid-e-Abrar banaya

Khuddam to bande hain tere khulq-e-hasan ne Pyare tujhe badkhwah ka ghamkhar banaya

Be-parda woh jab khak-nasheenon mein nikal aaye Har zarra ko khursheed-e-pur-anwar banaya

Ae mah-e-Arab mehr-e-Ajam mein tere sadqe Zulmat ne mere din ko shab-e-taar banaya

Lillah karam mere bhi veerana-e-dil par Sehra ko tere husn ne gulzar banaya

Allah Ta'ala bhi hua us ka tarafdar Sarkar tumhein jis ne tarafdar banaya

Gulzar-e-jinan tere liye Haq ne banaye Apne liye tera gul-e-rukhsar banaya

Be-yar-o-madadgar jinhein koi na pooche Aison ka tujhe yar-o-madadgar banaya

Har baat bada'amaliyon se main ne bigari Aur tum ne meri bigri ko har baar banaya

Us jalwa-e-rangeen ka tasadduq tha ke jis ne Firdaus ke har takhta ko gulzar banaya

Un ke dar-e-dandan ka woh sadqa tha ke jis ne Har qatra-e-nisan durr-e-shahwar banaya

No Internet? No Problem! Get the App for Offline Lyrics!

Is rooh-e-mujasam ke tabarruk ne Maseeha Jaan bakhsh tumhein yun dam-e-guftar banaya

Is chehra-e-pur-noor ki woh bheek thi jis ne Mehr-o-mah-o-anjum ko pur-anwar banaya

Un hathon ka jalwa tha yeh ae Hazrat-e-Musa Jis ne yad-e-baiza ko ziya bar banaya

Un ke lab-e-rangeen ki nichawar thi woh jis ne Pathar mein Hasan la'al-e-pur-anwar banaya