Aao Mehfil Mein Ghulaman e Rasool

Aao mehfil mein ghulaman-e-Rasool-e-Arabi Aaj hai josh pe faizan-e-Rasool-e-Arabi

Jhoomte phirte hain mastan-e-Rasool-e-Arabi Hai mehak par chamanistan-e-Rasool-e-Arabi

Kaise ush-shaq thay yaran-e-Rasool-e-Arabi Apne sar kardiye qurban-e-Rasool-e-Arabi

Aisi wus'at se bichha khwan-e-Rasool-e-Arabi Sara aalam hua mehman-e-Rasool-e-Arabi

Ka'aba-o-arz-o-sama shams-o-qamar hoor-o-malak Hain sabhi tabi-e-farman-e-Rasool-e-Arabi

Hoor-o-ghilman ki tamanna ho na shauq-e-jannat Jis ne dekha hai bayaban-e-Rasool-e-Arabi

Apni qismat pe na kyun fakhr karoon lakhon baar Dekhoon jab gumbad-e-aiwan-e-Rasool-e-Arabi

Us ne Allah ke jalwon ka kiya nazara Jis ne dekha rukh-e-taban-e-Rasool-e-Arabi

Un ki midhat nahin kuch ins-o-malak par mauqoof Zarra zarra hai sana khwan-e-Rasool-e-Arabi

Kis ko Sarkar se ni'amat na mili kaun hai woh Jo nahin banda-e-ehsan-e-Rasool-e-Arabi

Ramz-e-mehboob-o-muhib kaun samajh sakta hai Hukm-e-Rehman hai farman-e-Rasool-e-Arabi

Qabr-o-mehshar ka unhein gham hi nahin kuch aslan Jin ke hathon mein hai daman-e-Rasool-e-Arabi

Un ka banda hua Allah ka mehboob bana Saaf farmata hai Quran-e-Rasool-e-Arabi

Stop Wasting Storage - Download Lyrics in Lightweight Text Format!

Teera bakhton ke muqaddar ko zara chamka de Aye ziya-e-dur-e-dandan-e-Rasool-e-Arabi

Deen-o-duniya ki muyassar hui un ko shahi Jo huay dil se gadayan-e-Rasool-e-Arabi

Chhor kar saltanatein un ke banay khak nasheen Aafreen baad faqiran-e-Rasool-e-Arabi

Rubaru misl-e-kaf-e-dast hain dono aalam Kaisi purnoor hain chashman-e-Rasool-e-Arabi

Baada-e-hubb-e-Nabi khoob jamayi rangat Ho gaye mast ghulaman-e-Rasool-e-Arabi

Chashm-e-dil gor-e-ghariban ko munawwar karde Main fida sham-e-shabistan-e-Rasool-e-Arabi

Qabr mein jab ke Nakirein karein mujh se sawal Main kahoon banda-e-darban-e-Rasool-e-Arabi

Dakhil-e-khuld kiye jayenge ahl-e-isyan Josh par aayegi jab shan-e-Rasool-e-Arabi

Fatih-e-bab-e-shafa'at ke sabab hukm mila Jayen jannat mein gadayan-e-Rasool-e-Arabi

Ya-Ilahi yeh dua hai ke baroz-e-mahshar Sar pe ho saya-e-daman-e-Rasool-e-Arabi

Aye Jamil-e-Razvi teri haqeeqat kya hai Jab Khuda khud hai sana khwan-e-Rasool-e-Arabi

Yeh Raza ka hai tasadduq ke Jamil-e-Razvi Hua mashhoor sanakhwan-e-Rasool-e-Arabi Haan suna koi ghazal aur Jamil-e-Razvi Ke hain mushtaq muhibban-e-Rasool-e-Arabi