Parre Mujh Par Na kuch

Pare mujh par na kuch uftaad Ya Ghous Madad par ho teri imdaad Ya Ghous

Uray teri taraf baad-e-fana khaak Na ho mitti meri barbaad Ya Ghous

Meray dil mein basein jalway tumharay Yeh veerana banay Baghdad Ya Ghous

Na bhooloon bhool kar bhi yaad teri Na yaad aaye kisi ki yaad Ya Ghous

Mureedi la takhaf farmatay aao Bulaon mein hai yeh nashaad Ya Ghous

Galay tak aa gaya sailaab-e-gham ka Chala main aaiye faryaad Ya Ghous

Nasheman say ura kar bhi na chora Abhi hai ghaat mein sayyaad Ya Ghous

Khamida sar giraftar-e-qaza hai Kashida khanjar-e-jallaad Ya Ghous

Andheri raat jungle mein akela Madad ka waqt hai faryaad Ya Ghous

Khila do ghuncha-e-khaatir keh tum ho Bahaar-e-gulshan-e-ijaad Ya Ghous

Meray gham ki kahani aap sun lein Kahoon main kis say yeh rodaad Ya Ghous

Instant Access to Thousands of Lyrics - Tap to Install!

Rahoon azaad qaid-e-ishq kab tak Karo is qaid say azaad Ya Ghous

Karo gay kab tak acha mujh buray ko Meray haq mein hai kya irshaad Ya Ghous

Gham-e-dunya gham-e-qabr o gham-e-hashr Khudaya kar day mujh ko shaad Ya Ghous

Hassan mangta hai deday bheek daata Rahay yeh raaj paat aabad Ya Ghous