Nahi Mere Ache Amal

Nahin mere achhe amal Ghous-ul-Azam Magar tum pe rakhta hoon bal Ghous-ul-Azam

Tera daman-e-pak mujh se na chhoota Yeh hai umr ka ma-hasal Ghous-ul-Azam

Husain-o-Hasan phool bagh-e-Nabi ke Usi bagh ka tu hai phal Ghous-ul-Azam

Hai qaul-e-Khizr yeh ke sab awliya mein Nahin koi tera badal Ghous-ul-Azam

Bhikari tere Shams-o-Zuhra Attarid Gada Mushtari-o-Zuhal Ghous-ul-Azam

Tere naam ka jo bhi taweez bandhe Na ho us ko koi khalal Ghous-ul-Azam

Kiya tu ne aaram us jaan-ba-lab ko Woh thay dast-o-pa jis ke shal Ghous-ul-Azam

Shafa-khana-e-aam darbar-e-aali Tu shafi-e-jumla-e-alal Ghous-ul-Azam

Kiya ik nigah-e-karam ne tumhari Koi qutb koi badal Ghous-ul-Azam

Jo duniya mein hoga madad-khwah un se Sambhalenge kul us ki kul Ghous-ul-Azam

Khila de kali dil ki main tere sadqe Pareshan hoon aaj kal Ghous-ul-Azam

Dilase ko rakh hath seene pe mere Ke dil par hai ranjon ka dal Ghous-ul-Azam

Hain mushkil-kusha jad-e-amjad tumhare Karo mere uqdon ko hal Ghous-ul-Azam

Karam ke hain pyase tere naam lewa Khule aab-e-rehmat ka nal Ghous-ul-Azam

Teri khak-e-dar ka banaye jo surma To aankhein hon meri kharal Ghous-ul-Azam

Instant Access to Thousands of Lyrics - Tap to Install!

Tamanna hai dil mein ke Baghdad pahunchun Wahin mujh ko aaye ajal Ghous-ul-Azam

Tere dar pe rakha hua ho mera sar Jab aaye payam-e-ajal Ghous-ul-Azam

Mujhe shakal apni dikhana khudara Jab aaye payam-e-ajal Ghous-ul-Azam

Bahar aaye jis se hawa woh chala de Khule mere dil ka kanwal Ghous-ul-Azam

Hui char janib se aada ki yurish Zara tegh le kar sambhal Ghous-ul-Azam

Kuch aisa hua teri izzat ka shehra Ke goonj uthay dasht-o-jabal Ghous-ul-Azam

Yeh Qadir ke ghar se mili tujh ko izzat Qaza khwab se di badal Ghous-ul-Azam

Ata deen-e-Islam ko ho taraqqi Mita saare jhootay milal Ghous-ul-Azam

Jameel aarzoo hai ke mujh ko bula kar Sunen mujh se khud yeh ghazal Ghous-ul-Azam