Nahi Mere Ache Amal

نہیں میرے اچھے عمل غوثُ الاعظم مگر تم پہ رکھتا ہوں بل غوثُ الاعظم

ترا دامن پاک مجھ سے نہ چھوٹا یہ ہے عمر کا مَا حَصَل غوثُ الاعظم

حسین و حسن پھول باغِ نبی کے اسی باغ کا تو ہے پھل غوثُ الاعظم

ہے قولِ خضر یہ کہ سب اَولیا میں نہیں کوئی تیرا بدل غوثُ الاعظم

بھکاری ترے شمس و زُہرہ عطارِد گدا مشتری و زُحل غوثُ الاعظم

ترے نام کا جو بھی تعویذ باندھے نہ ہو اُس کو کوئی خلل غوثُ الاعظم

کیا تو نے آرام اس جاں بلب کو وہ تھے دست و پا جس کے شل غوثُ الاعظم

شفا خانۂ عام دَربارِ عالی تو شافیِ جملہ علل غوثُ الاعظم

کیا اِک نگاہِ کرم نے تمہاری کوئی قطب کوئی بدل غوثُ الاعظم

جو دنیا میں ہوگا مدد خواہ اُن سے سنبھالیں گے کل اس کی کل غوثُ الاعظم

کھلادے کلی دل کی میں تیرے صدقے پریشان ہوں آج کل غوثُ الاعظم

دِلاسے کو رکھ ہاتھ سینے پہ میرے کہ دِل پر ہے رَنجوں کا دَل غوثُ الاعظم

ہیں مشکل کشا جد اَمجد تمہارے کرو میرے عقدوں کو حل غوثُ الاعظم

کرم کے ہیں پیاسے ترے نام لیوا کھلے آبِ رحمت کا نل غوثُ الاعظم

تری خاکِ دَر کا بنائیں جو سرمہ تو آنکھیں ہوں میری کھرل غوثُ الاعظم

تمنا ہے دل میں کہ بغداد پہنچوں وَہیں مجھ کو آئے اَجل غوثُ الاعظم

ترے در پہ رکھا ہوا ہو مرا سر جب آئے پیامِ اَجل غوثُ الاعظم

مجھے شکل اپنی دکھانا خدارا جب آئے پیامِ اَجل غوثُ الاعظم

بہار آئے جس سے ہوا وہ چلا دے کھلے مرے دِل کا کنول غوثُ الاعظم

ہوئی چار جانب سے اَعدا کی یورِش ذرا تیغ لے کر سنبھل غوثُ الاعظم

کچھ ایسا ہوا تیری عزت کا شہرہ کہ گونج اُٹھے دَشت و جبل غوثُ الاعظم

یہ قادِر کے گھر سے ملی تجھ کو عزت قضا خواب سے دی بدل غوثُ الاعظم

عطا دِین اسلام کو ہو ترقی مٹا سارے جھوٹے ملل غوثُ الاعظم

جمیل آرزو ہے کہ مجھ کو بلا کر سنیں مجھ سے خود یہ غزل غوثُ الاعظم