Islam Ki Shauqat Sadaf e Deen

Islam ki shaukat, sadaf-e-deen ka gohar hai Shahkar-e-risalat jise kahiye, woh Umarؓ hai

Jis naam ke sadqe se duaon mein asar hai Woh naam-e-Umarؓ, naam-e-Umarؓ, naam-e-Umarؓ hai

Mahtab ke halqe mein sitare hain saf-ara Yun husn-e-shab-e-mah ka, hamrang-e-sahar hai

Woh sahan-e-Haram aur woh ik eent ka takiya Kya tarbiyat-e-Sarwar-e-Aalam ﷺ ka asar hai

Faqr aisa ke dein Qaisar-o-Kisra bhi salami Hukm aisa ke dariya bhi jhukaye hue sar hai

Adl aisa, pakar sakte hain kamzor bhi daman Rub aisa ke khud zulm ka dil zer-o-zabar hai

Katra ke guzar jata hai us din se har ik gham Jis din se mere wird-e-zaban, naam-e-Umarؓ hai

Why Screenshot When You Can Download? Get the App for Efficient Storage!

Kaabe mein namaz aaj ada ho ke rahe gi Khattab ke bete ki yeh aamad ka asar hai

Dil se jo pukaro ge Umarؓ ko, to dam-e-razm Yeh naam hi shamshir, yehi naam-e-sipar hai

"Hota jo koi Nabi mere baad, to Farooqؓ" Us ka hai yeh farman ke jo khair-e-bashar hai

Quran ki ayaat yeh deti hain gawahi Taqwa jise kehte hain, woh kirdar-e-Umarؓ hai

Jo saaf dimagon hi ko rakhta hai muattar Islam ke gulshan ka Umarؓ, woh gul-e-tar hai

Hai jin ki ghulami bhi ik aazaaz, woh la-raib Bubakrؓ hai, Usmanؓ hai, Haiderؓ hai, Umarؓ hai

Warid hai teri shaan mein lau kana nabiyyun Bin maane tere koi mafar hai, na muqarr hai

Har silsila-e-faiz mein chamke tere moti Koi hai Mujaddidؒ, to koi Ganj-e-Shakarؒ hai

Phir aaj zaroorat hai teri, nau-e-bashar ko Is ahd ka mazloom, tera rah-nigar hai

Woh daur na pa kar bhi yeh nisbat, ke Naseer aaj Bait teri afkaar ki, ba-dast-e-Umarؓ hai