Chal Diye Tum Aankh Mein

Chal diye tum aankh mein ashkon ka dariya chhod kar Ranj-e-furqat ka har ik seena mein shola chhod kar

Lazzat-e-mai le gaya woh jaam-o-meena chhod kar Mera saqi chal diya khud mai ko tishna chhod kar

Har jigar mein dard apna meetha meetha chhod kar Chal diye woh dil mein apna naqsh-e-wala chhod kar

Jama-e-mushkeen liye Arsh-e-Mualla chhod kar Farsh par aaye farishtay bazm-e-bala chhod kar

Aalam-e-bala mein har su marhaba ki goonj thi Chal diye jab tum zamane bhar ko sona chhod kar

Maut-e-aalim se bandhi hai maut-e-aalam be-gumaan Rooh-e-aalam chal diya aalam ko murda chhod kar

Free Up Space - Get Lyrics Without Bulky Screenshots!

Muttaqi ban kar dikhaye is zamane mein koi Ek mere Mufti-e-Azam ka taqwa chhod kar

Khwab mein aakar dikhao hum ko bhi ae jaan kabhi Kaun si duniya basayi tum ne duniya chhod kar

Ek tum duniya mein reh kar tarik-e-duniya rahe Reh ke duniya mein dikhaye koi duniya chhod kar

Is ka ae Shah-e-Zaman sara zamana ho gaya Jo tumhara ho gaya sara zamana chhod kar

Rehnuma-e-rah-e-jannat hai tera naqsh-e-qadam Rah-e-jannat tay na hogi tera rasta chhod kar

Misl-e-gardoon saya-e-dast-e-karam hai aaj bhi Kaun kehta hai gaye woh be-sahara chhod kar

Ho sake to dekh Akhtar bagh-e-jannat mein usay Woh gaya taaron se aagay aashiyana chhod kar