Bartar Qayas Se Hai Muqam

برتر قیاس سے ہے مقامِ ابُوالحسین سدرہ سے پوچھو رفعتِ بامِ ابُوالحسین

وارستہ پائے بستۂ دامِ ابُوالحسین آزاد نار سے ہے غلامِ ابُوالحسین

خطِ سیہ میں نورِ الٰہی کی تابشیں کیا صبحِ نُور بار ہے شامِ ابُوالحسین

ساقی سُنا دے شیشۂ بغداد کی ٹپک مہکی ہے بُوئے گُل سے مدامِ ابُوالحسین

بُوئے کباب سوختہ آتی ہے مے کشو چھلکا شرابِ چشت سے جامِ ابُوالحسین

گلگوں سحر کو ہے سَہَر سوزِ دل سے آنکھ سلطانِ سہرورد ہے نامِ ابُوالحسین

کرسی نشیں ہے نقش مُراد اُن کے فیض سے مولائے نقش بند ہے نامِ ابُوالحسین

جس نخلِ پاک میں ہیں چھیالیس ڈالیاں اِک شاخ ان میں سے ہے بنامِ ابُوالحسین

مستوں کو اے کریم بچائے خمار سے تا دور حشر دورئہ جامِ ابُوالحسین

اُنکے بھلے سے لاکھوں غریبوں کا ہے بھلا یاربّ زمانہ باد بکامِ ابُوالحسین

میلا لگا ہے شانِ مسیحا کی دِید ہے مُردے جِلا رہا ہے خرامِ ابُوالحسین

سرگشتہ مہر و مہ ہیں پَر اب تک کھلا نہیں کس چرخ پر ہے ماہ تمامِ ابُوالحسین

اتنا پتہ ملا ہے کہ یہ چرخ چنبری ہے ہفت پایہ زینۂ بامِ ابُوالحسین

ذرّہ کو مہر، قطرہ کو دریا کرے ابھی گر جوش زن ہو بخشش عامِ ابُوالحسین

یحیٰی کا صَدقہ وارثِ اقبال مند پائے سجادئہ شیوخ کرامِ ابُوالحسین

انعام لیں بہارِ جِناں تہنیت لکھیں پھولے پھلے تو نخلِ مرامِ ابُوالحسین

اللہ ہم بھی دیکھ لیں شہزادہ کی بہار سُونگھے گلِ مراد مشامِ ابُوالحسین

آقا سے میرے ستھرے میاں کا ہوا ہے نام اس اچھے ستھرے سے رہے نامِ ابُوالحسین

یاربّ وہ چاند جو فلکِ عزّ و جاہ پر ہر سیر میں ہو گام بگامِ ابُوالحسین

آؤ تمہیں ہلال سپہر شرف دکھائیں گردن جھکائیں بہر سلامِ ابُوالحسین

قدرت خدا کی ہے کہ طلاطم کناں اٹھی بحر فنا سے موج دوامِ ابُوالحسین

یاربّ ہمیں بھی چاشنی اس اپنی یاد کی جس سے ہے شکّریں لب و کامِ ابُوالحسین

ہاں طالِع رضاؔ تِری اللہ رے یاوری اے بندئہ جدود کرامِ ابُوالحسین