Zat Qadeem Sahib-e-Har Fakhar-o-Naz Hai

Zat-e-Qadeem sahib-e-har fakhr-o-naaz hai Sattar hai Samad hai wahi be-niyaaz hai

Rehta hai meherbaan do aalam pe har ghari Mera Khuda Kareem hai, banda-nawaaz hai

Jhukte hain uske aage malak bhi Rasool bhi Saara usi ke waaste aajz-o-niyaaz hai

Naghma-sara-e-hamd hai baarish ki boond boond Dast-e-saba mein uski aqeedat ka saaz hai

Jalwa-gari usi ki hai Nargis ki aankh mein Uske karam se kaakul-e-sumbul daraaz hai

Your Lyrics, Even Offline - Install the App for Free!

Woh kholta hai gumbad-e-be-dar mein khidkiyan Duniya mein uska lutf bila-imtiyaaz hai

Karta hai roz ek nayi shaan se zuhoor Yeh ikhtilaf-e-subh-o-masa uska raaz hai

Ma'bood hai Majeed-o-Mu'een-o-Mughees bhi Mushkil-kusha wahi hai wahi kaar-saaz hai

Iyyaaka na'budu kahein Iyyaaka nasta'een Me'raaj-e-bandagi ka zariya namaz hai

Larzaan hain arz-o-koh-o-falak uske saamne Allah ka kalaam bada jaan-gudaaz hai

Anwaar-e-ism-e-zat ki taaseer ke tufail Dil mein hai kaif rooh mein ik ehtizaaz hai

Jab maut hai waseela-e-deedar-e-zat-e-Haq Phir aadmi ko maut se kyun ehtiraaz hai

Rehte hain sada uske khazanon ke munh khule Har lahza us Ghani ka dar-e-jood baaz hai

Paata hai zat-e-Haq se woh taufeeq-e-naat ki Shahzad uske fazl se jo sarfaraaz hai