Zameen Ke Log Hon

Zameen ke log hon ya ahl-e-aalam-e-baala Har ik zabaan pe hai Subhaana Rabbiyal A'laa

Tere qalam ki gawaahi, muraqqa-e-aalam Fazaaein aaeena hain, dil ho dekhne wala

Diye haseen khado-khaal tu ne mitti ko Tere jamaal ke saanchon ne aadmi dhaala

Thamaai mehar ko lail-o-nahaar ki dori Saba ko sonp di aaraayish-e-gul-o-laala

Zameen-e-teera ke munh se laga diya tu ne Mah-o-nujoom bhara aasmaan ka pyaala

Never Be Without Your Favorite Lyrics - Get the App for Offline Access!

Parhay qaseeda-e-wahdat, hujoom-e-kon-o-makaan Tu sab ka Rab hai kisi ne tujhe nahin paala

Mujhe hi tu ne diya ikhtiyaar-e-laghzish bhi Mujhi pe apni khilafat ka bojh bhi daala

Utaar kar mere seene mein aagahi ke chaand Baseeraton ka mere gird khench de haala

Har ek saans ko meri, bana charaagh-e-haram Na ho zara bhi, mera naama-e-amal kaala