Hub e Dunya Se Tu Bacha

Hubb-e-dunya se tu bacha Ya Rabb Ashiq-e-Mustafa bana Ya Rabb

Karde Hajj ka sharaf ata Ya Rabb Sabz gumbad bhi de dikha Ya Rabb

Hai teri hi inayat-o-rehmat Mujh ko Makkah bula liya Ya Rabb

Aaj hai rubaru mere Ka’bah Silsila hai tawaf ka Ya Rabb

Abr barsa de noor ka main loon Barish-e-noor mein naha Ya Rabb

Kash lab par mere rahe jaari Zikr aathon pahar tera Ya Rabb

Chashm-e-tar aur qalb-e-muztar de Apni ulfat ki may pila Ya Rabb

Your Lyrics, Even Offline - Install the App for Free!

Aah! tughyaniyan gunahon ki Paar naiya meri laga Ya Rabb

Nafs-o-shaitan ho gaye ghalib In ke chungal se tu chura Ya Rabb

Kar ke tauba main phir gunahon mein Ho hi jata hoon mubtala Ya Rabb

Neem jaan kar diya gunahon ne Marz-e-isiyan se de shifa Ya Rabb

Kis ke dar par main jaunga Maula Gar tu naraz ho gaya Ya Rabb

Waqt-e-rihlat ab aa gaya Maula Jalwa-e-Mustafa dikha Ya Rabb

Qabr mein aah! ghup andhera hai Roshni ho paye Raza Ya Rabb

Sanp lipten na mere laashe se Qabr mein kuch na de saza Ya Rabb

Noor-e-Ahmad se qabr roshan ho Wehshat-e-qabr se bacha Ya Rabb

Haye! husn-e-amal nahin palle Hashr mein mera hoga kya Ya Rabb

Garmi-e-hashr, pyaas ki shiddat Jaam-e-Kausar mujhe pila Ya Rabb

Khauf dozakh ka aah! rehmat ho Khak-e-Taibah ka wasta Ya Rabb

Mera nazuk badan Jahannam se Az tufail-e-Raza bacha Ya Rabb

Talib-e-maghfirat hoon Ya Allah Bakhsh Haider ka wasta Ya Rabb

Sab ne thukra diya to kya parwa Mujh ko tera hai aasra Ya Rabb

Zulf-e-mehboob ka bana qaidy Aur hargiz na phir chura Ya Rabb

Mushkilon mein de sabr ki taufiq Apne gham mein faqat ghula Ya Rabb

De de soz-e-Bilal Ya Allah Ashkbar aankh ho ata Ya Rabb

Aah! a'da hain khoon ke pyase Dushmano se mujhe bacha Ya Rabb

De shahadat mujhe Madine mein Azpaye Shah-e-Karbala Ya Rabb

Sabz gumbad ke zer-e-sayah ho Jaan meri jism se juda Ya Rabb

Qabr meri bane Madine mein Tujh se hai yeh meri dua Ya Rabb

Hirs-e-dunya nikal de dil se Bas rahoon talib-e-Raza Ya Rabb

De de "qufl-e-Madinah" aankhon ka Wasta chaar yaar ka Ya Rabb

De de "qufl-e-Madinah" lab ka bhi Wasta chaar yaar ka Ya Rabb

Kash! aadat fuzool baton ki Door ho azpaye Raza Ya Rabb

Wasta mere Peer-o-Murshid ka Mujh ko tu muttaqi bana Ya Rabb

Dil ka ujra chaman ho phir aabad Koi aisi hawa chala Ya Rabb

Har baras kash! aa ke Makkah mein Lutf uthaoon tawaf ka Ya Rabb

Jis kisi ne kaha, "dua karna" Us ka poora ho mudda'a Ya Rabb

Kar de Jannat mein tu jawar un ka Apne Attar ko ata Ya Rabb