Bakhsh De Meri Har Ik Khata

Bakhsh de meri har ik khata Ya Khuda Fazl se nek banda bana Ya Khuda

Hoon buron se bhi barh kar bura Ya Khuda Sadqa achhon ka achha bana Ya Khuda

Dard-e-isyan ki de de dawa Ya Khuda Nekiyon mein mera dil laga Ya Khuda

Naar-e-dozakh se mujh ko bacha Ya Khuda Bagh-e-jannat mein ghar kar ata Ya Khuda

Nafs-o-shaitan ke sharr se tu mehfooz rakh Aur gunahon se har dam bacha Ya Khuda

Tu bana nek nekon ke sadqe mujhe Aur paband-e-sunnat bana Ya Khuda

Hoon gunahon ke amraaz se neem jaan Az paye Mustafa de shifa Ya Khuda

No More Screenshots! Save Storage with Our Lyrics App!

Ghibaton, chughliyon, aib-dariyon se aur Jhoot se bhi mujhe tu bacha Ya Khuda

Kash! be-kar baton se bachta rahoon Bas karoon Teri hamd-o-sana Ya Khuda

Har ghari wird-e-lab ho durood-o-salam Yawa-goi se mujh ko bacha Ya Khuda

Kash! aksar nigahain jhuki hi rahain Ho ata aisi sharm-o-haya Ya Khuda

Husn-e-akhlaq ki mujh ko khairat de Bheek ikhlas ki ho ata Ya Khuda

Khauf se Tere dil thartharaata rahe Aankh aansoo bahaye sada Ya Khuda

Sabz gumbad ke saaye mein ae kash! ho Mera iman par khatma Ya Khuda

Maut ke waqt ho jaye Maula naseeb Dekhna jalwa-e-Mustafa Ya Khuda

Aah! mehshar ki dhoop al-atash al-atash Un se ik jaam-e-Kausar dila Ya Khuda

Bakhsh de be-hisab ae Khuda bakhsh de Tujh ko mehboob ka wasta Ya Khuda

Mere maan baap ki aal-o-ahbab ki Maghfirat kar baraye raza Ya Khuda

Mujh ko farma de hajj ki sa'adat ata Phir Madine ki galiyan dikha Ya Khuda

Mujh ko ishq-e-Muhammad ki soghat de Ashk-bar aankh bhi ho ata Ya Khuda

Ghaus-e-Azam ka sadqa mujhe khwab mein Apne pyare ka jalwa dikha Ya Khuda

Tera Attar boorha hua ab tu door Is se kar de tu hirs-o-hawa Ya Khuda

Fazl-o-rehmat se jannat mein Attar ko Mustafa ka parosi bana Ya Khuda