Aye Charah Gar e Shouq Se

اے چارہ گرِ شوق کوئی ایسی دوا دے جو دل سے ہر اک غیر کی چاہت کو بھلا دے

بس دیکھ لیا دنیا کے رشتوں کا تماشا مخلوق سے امید کے سب دیپ بجھا دے

پاکیزہ تمنائیں بھی لاتی ہیں اداسی ہر ذوقِ طلب، ذوقِ تمنا مٹا دے

کیوں نیک گمانوں کے سہارے پہ جیئے ہے ان سارے فریبوں کو ،سرابوں کو مٹا دے

دیکھے یا نہ دیکھے یہ تو محبوب کا حق ہے تو آہ و فغاں کر نہ ہی غیروں کا گلہ دے

دے لذتِ دیدار کی بے ہوشی میں وہ ہوش جو ہستی کی تعریف و تعین کو گنوا دے

ناسوت و ملکوت و جبروت کے احوال لاہوتی و ہاہوتی دوائر میں ملا دے

اک میں ہوں فقط تو ہو عالمِ ہُو ہو اے حسنِ ازل سارے حجابات اٹھا دے

ہر فعل صفت ذات سے یوں مجھ کو فنا کر کوئی مجھے جانے نہ کوئی مجھ کو صدا دے

میں خود کو بھی خود اپنے سے پھر ڈھونڈ نہ پاؤں یوں آتش سوزاں سے مری راکھ جلا دے

انوار و معانی طبائع سے جدا کر اب عالم واحدات میں گم گشتہ بنا دے

ہوں ترے حجابات کی دہلیز پہ کب سے اک بار ذرا دیکھ لے اک پردہ ہٹا دے

ہے روح کو ہر لمحہ ترے وَصل کی امید آ زیست کی شب کو تو کبھی صبح بنا دے

سو بار بلایا تجھے سو بار ستایا تو بھی تو کبھی رات کو مل، چھپ کے ندا دے

Your Lyrics, Even Offline - Install the App for Free!

خود دیکھ لے تو سویا ہے میں جاگ رہا ہوں تو بھی تو کبھی میری وفاؤں کا صلہ دے

بس ایک ہی صورت ہے اِدھر ان کی نظر کی جز ان کے ہر اِک یاد ہر اِک بات بھلا دے

کیوں ہوک سی اٹھتی ہے دلِ زار سے طاہر اس بستیِ ویراں کے خس و خاشاک جلا دے