Aye Charah Gar e Shouq Se
Shaykh ul Islam Dr. Muhammad Tahir ul Qadri
Ae chara-gar-e-shauq koi aisi dawa de Jo dil se har ek ghair ki chahat ko bhula de
Bas dekh liya duniya ke rishton ka tamasha Makhlooq se umeed ke sab deep bujha de
Pakeeza tamannayen bhi lati hain udasi Har zauq-e-talab, zauq-e-tamanna mita de
Kyun nek gumanon ke saharay pe jiye hai In saray farebon ko, sarabon ko mita de
Dekhay ya na dekhay yeh toh mehboob ka haq hai Tu aah-o-fughan kar na hi ghairon ka gila de
De lazzat-e-deedar ki behoshi mein woh hosh Jo hasti ki tareef-o-taayyun ko ganwa de
Nasoot-o-malakoot-o-jabroot ke ahwal Lahooti-o-hahooti dawa'ir mein mila de
Ek mein hoon faqat tu ho alam-e-hoo ho Ae husn-e-azal saray hijabat utha de
Har fa'l sifat zaat se yun mujh ko fana kar Koi mujhe janay na koi mujh ko sada de
Main khud ko bhi khud apnay se phir dhoond na paaun Yun aatish-e-sozan se meri raakh jala de
Anwar-o-ma'ani tabaye se juda kar Ab alam-e-wahidat mein gum-gashta bana de
Hoon teray hijabat ki dehleez pe kab se Ek baar zara dekh le ek pardah hata de
Hai rooh ko har lamha teray vasl ki umeed Aa zeest ki shab ko tu kabhi subah bana de
Sau baar bulaya tujhay sau baar sataya Tu bhi toh kabhi raat ko mil, chup ke nida de
More Lyrics, Less Storage - Install the App and Ditch the Screenshots!
Khud dekh le tu soya hai main jaag raha hoon Tu bhi toh kabhi meri wafaon ka sila de
Bas ek hi surat hai idhar un ki nazar ki Juz un ke har ek yaad har ek baat bhula de
Kyun hook si uthti hai dil-e-zaar se Tahir Is basti-e-veeran ke khas-o-khashak jala de
© 2026 Midhah Lyrics. All rights reserved