Hum Maikada Se Mar Ke Bhi Bahar Na Jayenge

ہم مے کدہ سے مر کے بھی باہر نہ جائیں گے مے کش ہماری خاک کے ساغر بنائیں گے

وہ اک کہیں گے ہم سے تو ہم سو سنائیں گے منہ آئیں گے ہمارے تو اب منہ کی کھائیں گے

کچھ چارہ سازی نالوں نے کی ہجر میں مری کچھ اشک میرے دل کی لگی کو بجھائیں گے

وہ مثل اشک اٹھ نہیں سکتہ زمین سے جس کو حضور اپنی نظر سے گرائیں گے

جھونکے نسیم صبح کے آ آ کے ہجر میں اک دن چراغ ہستیٔ عاشق بجھائیں گے

Your Lyrics, Even Offline - Install the App for Free!

صحرا کی گرد ہوگی کفن مجھ غریب کا اٹھ کر بگولے میرا جنازہ اٹھائیں گے

اب ٹھان لی ہے دل میں کہ سر جائے یا رہے جیسے اٹھے گا بار محبت اٹھائیں گے

گردش نے میری چرخ کا چکرا دیا دماغ نالوں سے اب زمیں کے طبق تھرتھرائیں گے

بیدمؔ وہ خوش نہیں ہیں تو اچھا یوں ہی سہی نا خوش ہی ہو کے غیر مرا کیا بنائیں گے