Zubaan Mehv e Sana Hai Gumbad e Khizra Ke Saye Main

زباں محو ثناء ہے گنبدِ خضریٰ کے ساۓ میں مودب التجا ہے گنبدِ خضریٰ کے ساۓ میں

درِ بخشش کھلا ہے گنبدِ خضریٰ کے ساۓ میں برا بھی پارسا گنبدِ خضریٰ کے ساۓ میں

سرِ محشر بھی میزان کرم پر تولا جاۓ گا وہ آنسو جو گرا ہے گنبدِ خضریٰ کے ساۓ میں

کلامِ پاک دیتا ہے گواہی اس حقیقت کی مقدر جاگتا ہے گنبدِ خضریٰ کے ساۓ میں

کبھی خود کو کبھی ان کے کرم کو دیکھتا ہوں میں کہ مجھ سا بے نوا ہے گنبدِ خضریٰ کے ساۓ میں

طلب کرنے سے پہلے گوہرِ مقصود ملتا ہے یہ توقیر گدا ہے گنبدِ خضریٰ کے ساۓ میں

شفاعت کی سند پا کر اٹھا شانِ کریمی سے جو مجرم آگیا ہے گنبدِ خضریٰ کے ساۓ میں

اگر سینے میں ہوتا تو دھڑکنے کی صدا آتی یہ دل کھویا ہواہے گنبدِ خضریٰ کے ساۓ میں

اسے کیا گرمیء خورشید محشر خاک یاد آۓ کہ جو بیٹھا ہوا ہے گنبدِ خضریٰ کے ساۓ میں

وہیں لے جائیں میرے چارہ گر احسان فرمائیں میرے دکھ کی دوا ہے گنبدِ خضریٰ کے ساۓ میں

جسے خلدِ بریں سے اہلِ دل تعبیر کرتے ہیں وہی آب وہوا ہے گنبدِ خضریٰ کے ساۓ میں

سمجھتا ہے خموشی کی زباں ان کا کرم خالدؔ خاموشی بھی صدا ہے گنبدِ خضریٰ کے ساۓ میں