Woh Din Bhi Bhala Ho Ga

Woh din bhi bhala hoga qismat bhi bhali hogi Jab saamne aankhon ke Taiba ki gali hogi

Mahki hai fiza saari Sarkar ki khushbu se Yeh thandi hawa un ke koochay se chali hogi

Mehsoos yahi hoga din phir se nikal aaya Sarkar ke rozay par jab shaam dhali hogi

Khush-bakht Halima par rashk aaya do-aalam ko Aaqa ko laga seenay jab ghar ko chali hogi

Instant Access to Thousands of Lyrics - Tap to Install!

Roshan woh sada hoga zulmat ki ghataon mein Kuch khaak-e-qadam un ki jis munh pe mili hogi

Har sheereen-zabaan un ki guftaar pe warafta Qurbaan tabassum par har khilti kali hogi

Maqbool Zahoor-e woh mehfil hai sada jis mein Tauseef-e-Nabi hogi, tareef-e-Nabi hogi