Un Ko Dekha Toh Gaya Bhool

In ko dekha to gaya bhool main gham ki surat Yaad bhi ab to nahin ranj-o-alam ki surat

Khwab mein dekhun agar dafi-e-gham ki surat Phir na waqi ho kabhi ranj-o-alam ki surat

Aable paaon mein par jaayen jo chalte chalte Raah-e-Taibah mein chalun sar se qadam ki surat

Tum agar chaaho to ik cheen-e-jabeen se apni Kardo aada ko qalam shaakh-e-qalam ki surat

Naam-e-wala tera ae kaash misaal-e-Majnoon Reg par ungliyon se likhun qalam ki surat

Tera deedar kare rahm-e-mujassam tera Dekhni ho jise Rahman ke karam ki surat

Aap hain shaan-e-karam kaan-e-karam jaan-e-karam Aap hain fazl-e-atam lutf-e-aam ki surat

Ik ishara tere abru ka shah-e-hardosara Kaat de dushmanon ko tegh-e-dudam ki surat

Aap ka misl shaha kaise nazar mein aaye Kis ne dekhi hai bhala ahl-e-adam ki surat

Get Lyrics On-The-Go! Download Our App Now!

Moom hai un ke qadam ke liye dil patthar ka Sang ne dil mein rakhi un ke qadam ki surat

Khwab mein bhi na nazar aaye agar tum chaaho Dard-o-gham, ranj-o-alam, zulm-o-sitam ki surat

Ae sahab-e-karam ik boond karam ki par jaaye Safha-e-dil se mere mahv ho gham ki surat

Jab se sookhe hain mere kisht-e-amal baagh-e-amal Yaad aati hai mujhe abr-e-karam ki surat

Safha-e-dil pe mere naam-e-Nabi kunda ho Naqsh ho dil pe mere un ke alam ki surat

Teri tasveer khinche rooh-e-munawwar kyun kar Kaise khinche koi misbah-e-zulam ki surat

Aayen jo khwab mein woh ho shab-e-gham eid ka din Jaayen to eid ka din ho shab-e-gham ki surat

Jaayen gulshan se to lut jaaye bahaar-e-gulshan Dasht mein aayen to ho dasht-e-Iram ki surat

Bheer ko khauf na ho sher se jo tum chaaho Tum jo chaaho to bane sher ghanam ki surat

Koh ho jaayen agar chaaho to sona chandi Sangreze banen deenaar-o-diram ki surat

Surat-e-paak woh be-misl hai paayi tum ne Jis ki saani na Arab aur na Ajam ki surat

Dam nikal jaaye mera raah mein un ki Noori Un ke koocha mein rahun naqsh-e-qadam ki surat