Tumhein Ne Toh Kiya

Tumhein ne to kiya hum ko musalman Ya RasulAllah Tumhein to ho hamara deen-o-imaan Ya RasulAllah

Na bhoole aur na bhoolo ge qayamat tak ghulamon ko Na kyun hon Ahlesunnat tum pe qurban Ya RasulAllah

Faqat yeh aarzoo hai naz'a mein marqad mein mahshar mein Kahein hum se na chhoote tera daaman Ya RasulAllah

Liwa-ul-Hamd ke neeche bane Maula qayamat mein Mera har rongta tera sana khwan Ya RasulAllah

Tere husn-o-malahat par do alam kyun na hon qurban Khuda-e-pak hai jab tera khwahan Ya RasulAllah

Makaan-o-lamakaan hoor-o-malak arsh-o-falak kursi Tumhare hi liye yeh sab hai saamaan Ya RasulAllah

Teri turbat ke aage arsh ka bhi sar khameeda hai Buland aflak se hai tera aiwan Ya RasulAllah

Salateen-e-zamana aastan par sar ragadte hain Tumhari khaak-e-dar hai taj-e-shahan Ya RasulAllah

Karoron naimaton se be-talab adna ishare mein Bhare alam ke tum ne jaib-o-daaman Ya RasulAllah

Mareezan-e-jahan ko tum shifa dete ho dam bhar mein Khudara dard ka ho mere darman Ya RasulAllah

Main ik adna bhikhari aap sultan-e-zamana hain Sulaiman aap main moor-e-Sulaiman Ya RasulAllah

Tumhare noor se Haq ne kiye kaun-o-makaan zahir Tumhein zarraat-e-alam mein ho taaban Ya RasulAllah

Liya tha roz-e-meesaq ambiya se Haq Ta'ala ne Tumhari pairvi ka ahd-o-paiman Ya RasulAllah

Banaya hai Khuda ne donon alam ka tujhe hakim Saron par lete hain sab tera farman Ya RasulAllah

Your Lyrics, Even Offline - Install the App for Free!

Tu hai banda Khuda-e-pak ka main tera banda hoon Tawassut se tere hoon abd-e-Rahman Ya RasulAllah

Khuda ke baad afzal jaanna tum ko do-alam se Yehi to hai hamara deen-o-imaan Ya RasulAllah

Tere fazl-o-karam se door kya hai gar main ban jaaun Teri chaukhat ke darbanon ka darban Ya RasulAllah

Sada-e-soor sun kar aap ka parhta hua kalma Main uthoon qabr se shadan-o-khandan Ya RasulAllah

Ghulamon ki har ik mushkil mein tum imdad karte ho Meri bhi mushkilein ho jayen aasaan Ya RasulAllah

Jameel Qadri ki do jahan mein laaj rakh lena Tufail Hazrat-e-Ahmad Raza Khan Ya RasulAllah