Tere Darbar Ke Jibrael Darban

Tere darbar ke Jibraeel darbaan YaRasoolAllah Teri sarkar ke khadim hain Rizwan YaRasoolAllah

Hazaron nazrah parh parh ke hafiz ho gaye us ke Tumhara mus'haf-e-rukh hai ke Quran YaRasoolAllah

Teri seerat ne lakhon but paraston ko kiya momin Teri surat dawa-e-dard mandan YaRasoolAllah

Instant Access to Thousands of Lyrics - Tap to Install!

Dur-e-dandan-e-aqdas ki jhalak ka ek parto hai Jo hain aflak par anjum darakhshan YaRasoolAllah

Musibat door bhage mushkilen aasaan hon foran Pukare jo koi tum ko Musalman YaRasoolAllah

Tera ik qatra-e-darya-e-rehmat surkhuru karde Gunahon ne kiya be-had pasheman YaRasoolAllah

Shaheed-e-Karbala ki pyas ka sadqa baras jaaye Siyah karon pe tera abr-e-neesan YaRasoolAllah

Asar kyon kar karegi aaftab-e-hashr ki garmi Mere sar par to hoga tera daaman YaRasoolAllah

Tujhe dekhun tere yaron ko dekhun aur tere Rab ko Mujhe ho eid-gah mahshar ka maidan YaRasoolAllah

Qayamat mein madad karna meri ae Shafe'-e-Mahshar Bajuz tere wahan hai kaun pursan YaRasoolAllah

Barati sath hon dulha ke jab maidan-e-mahshar mein To us mein main banun tera sana-khwan YaRasoolAllah

Kharidaron mein is aasi ko bhi farmaniye shamil Khule jab hashr mein rehmat ki dukkaan YaRasoolAllah

Ajal nazdeek hai us sabz gumbad ki ziyarat ka Kahin dil hi mein le jaaun na armaan YaRasoolAllah

Sunahri jaliyon ke samne gar mera dam nikle Muyassar ho mujhe lutf-e-farawan YaRasoolAllah

Jo munkir hain woh jalte hain Nabi ke naam-e-nami se Pukara karte hain har dam Musalman YaRasoolAllah

Jameel-e-Qadri darbar-e-Haq mein pesh ho jis dam To keh dena yeh hai mera sana khwan YaRasoolAllah