Tera Shukriya Tajdar e Madina

تِرا شکریہ تاجدارِ مدینہ مجھے پھر دِکھایا دِیارِ مدینہ

حَسیں پتّا پتّا حَسیں ڈالی ڈالی حَسیں سب کا سب لالہ زارِ مدینہ

خدا! دل سے دنیا کی اُلفت مِٹا دے تُو دے اُلفتِ تاجدارِ مدینہ

بُھلا دے چمن کے نظاروں کو بیشک ہے ایسا حَسیں رَیگزارِ مدینہ

میں رِضوانِ جنّت کو تحفے میں دونگا عطا کیجئے چند خارِ مدینہ

Offline Lyrics Anytime, Anywhere - Download the App Today!

مدینے میں گھر سب کے غمخوار کا ہے جبھی تو سبھی ہیں نثارِ مدینہ

تجھے واسِطہ یاخدا مصطَفٰے کا بنا دے مجھے دلفِگارِ مدینہ

اگر ہو یقیں زخم بھر جائیں گے سب لگا لو ذرا سا غُبارِ مدینہ

تڑپتے ہیں جو ہِجر و فُرقت میں آقا دِکھا دو انہیں بھی بہارِ مدینہ

اِدھر سے اُدھر کیوں بھٹکتا پھروں میں مقدّر سے ہوں رَیزہ خوارِ مدینہ

مدینے میں مرنے کا مجھ کو شَرَف دو کرم یانبی تاجدارِ مدینہ

دو عطّارؔ کو اشکبار آنکھ آقا پئے غوث یاشہریارِ مدینہ