Sukhan Ki Daad Khuda Se

Sukhan ki daad Khuda se wasool karti hai Zabaan aaj sana-e-Rasool ﷺ karti hai

Kahi hai naat-e-Nabi ﷺ rooh ki namu ke liye Lahu mein doob gaya hai qalam wuzu ke liye

Har ek saans Muhammad ﷺ ke naam par nikla Khayal, zehan se ehram baandh kar nikla

Huzoor yun meri aankhon ke saamne aaye Koi charagh ki lau jaise thaamne aaye

Jabeen liye, jo qadam ke nishan tak pahuncha Qad-e-haqeer mera aasmaan tak pahuncha

Nabi ka gosh-e-daaman jo haath mein aaya Simat ke saara jahan meri zaat mein aaya

Woh aks-e-qurb meri rooh mein utarne lage Ke meri khaak pe aaine rashk karne lage

Instant Access to Thousands of Lyrics - Tap to Install!

Nazar ne aap ke jalwon ka jab tawaf kiya Khuda ne mujh se gunahgaar ko maaf kiya