Qamar Ke Do Kiye Ungali Se

Qamar ke do kiye ungli se taqat usko kehte hain Hawa ik dam mein ud-ush-shams qudrat usko kehte hain

Jo phaila tha andhera is jahan mein kufr-o-bid'at ka Woh ik dam mein mita sham'e-hidayat usko kehte hain

Jo dekhein hazrat-e-Yousuf jamal-e-sayyid-e-alam To farmayein qasam haq ki malahat usko kehte hain

Banaya unko mukhtar-e-do-alam unke Maula ne Khilafat aisi hoti hai niabat usko kehte hain

Shab-e-meraj yeh ghul tha malaik hoor-o-ghilman mein Haseen hote hain aise khoobsurat usko kehte hain

Koi chauthe falak par Toor par koi magar Aqa Gaye Arsh-e-Mu'alla par wajahat usko kehte hain

Lagaya surma-e-ma-zag haq ne unki aankhon mein Woh hain har cheez ke nazir basarat usko kehte hain

Nahi hai aur na hoga ba'd Aqa ke Nabi koi Woh hain Shah-e-Rusul khatm-e-nabuwwat usko kehte hain

Laga kar pusht par muhar-e-nabuwwat haq ta'ala ne Unhein aakhir mein bheja khatamiyyat usko kehte hain

Bhikari ban ke is dar par jo mango ge woh pao ge Ke arbab-e-nazar bab-e-ijabat usko kehte hain

Bala se pehle aati hai madad teri ghulamon par Tere sadqe Arab wale i'anat usko kehte hain

Jo alam ke shikam ko ne'maton se sair farmayein Woh khud faqe karein do do qana'at usko kehte hain

Duayein de rahe hain dushmano ko zulm ke badle Haleem aise hua karte hain rehmat usko kehte hain

Tufail-e-Sarwar-e-Alam Madinah hum jo dekhein ge Kahein ge dil mein khush ho kar ke jannat usko kehte hain

Tumhara sabz gumbad dekh kar hai Arsh sakta mein Bulandi kis qadar payi hai rif'at usko kehte hain

Ghulaman-e-Nabi ko Hazrat-e-Musa ne jab poocha To farmaya Khuda ne khair-e-ummat usko kehte hain

Arab ke chand ki jab roshni phaile gi mahshar mein Kahein ge anbiya mah-e-risalat usko kehte hain

Stop Wasting Storage - Download Lyrics in Lightweight Text Format!

Teri shan-e-rahimi josh par jis waqt aaye gi Uthe ga shor mahshar mein ke rehmat usko kehte hain

Rafiq-e-Mustafa Siddiq-e-Akbar ghar-e-Thaur mein Hain jaan dene ko aamada rafaqat usko kehte hain

Kata kar sar Hussain ibn-e-Ali rah-e-ilahi mein Shaheedon ke hue sarwar shahadat usko kehte hain

Farishton yaad rakhna naam is aasi ka mahshar mein Jameel Qadri sab ahle-sunnat usko kehte hain