Noor e Haq Jalwa Numa Tha

نورِ حق جلوہ نما تھا مجھے معلوم نہ تھا شکلِ انساں میں چھپا تھا مجھے معلوم نہ تھا

بارہا جس نے کہا تھا اَنَا بَشَر اس نے مَن رَّاٰنِیْ بھی کہا تھا مجھے معلوم نہ تھا

بکریاں جس نے چرائی تھیں حلیمہ تیری عرش پر وہ ہی گیا تھا مجھے معلوم نہ تھا

جس نے اُمت کے لیے روکے گزاریں راتیں وہ ہی محبوبِ خدا تھا مجھے معلوم نہ تھا

چاند اِشارے سے پھٹا حکم سے سورج لوٹا مظہرِ ذاتِ خدا تھا مجھے معلوم نہ تھا

دیکھا جب قبر میں اس پردہ نشیں کو تو کھلا دِلِ سالکؔ میں رہا تھا مجھے معلوم نہ تھا