Mujrim Haibat Zada Jab

Mujrim-e-haibat-zada jab fard-e-isyaan le chala Lutf-e-Shah-e-taskeen deta pesh-e-Yazdaan le chala

Dil ke aa'ine mein jo tasveer-e-jaanaan le chala Mehfil-e-jannat ki aaraish ka saamaan le chala

Rahraw-e-jannat ko Taiba ka bayaabaan le chala Daaman-e-dil khenchta khaar-e-mughilaan le chala

Gul na ho jaaye charagh-e-zeenat-e-gulshan kahin Apne sar mein main hawa-e-dasht-e-jaanaan le chala

Ru-e-aalam-taab ne baanta jo baara noor ka Maah-e-nau kashti mein pyaala mehr-e-taabaan le chala

Go nahin rakhte zamaana ki woh daulat apne paas Par zamaana ne'amaton se bhar ke daamaan le chala

Teri haibat se mila taaj-e-salaateen khaak mein Teri rahmat se gada takht-e-Sulaimaan le chala

Aisi shaukat par ke urta hai pharera arsh par Jis gada ne aarzoo ki un ko mehmaan le chala

Dabdaba kis se bayaan ho un ke naam-e-paak ka Sher ke munh se salaamat jaan-e-Salmaan le chala

Sadqe us rahmat ke un ko roz-e-mehshar har taraf Naashakeeba shor-e-faryaad-e-aseeraan le chala

Saaz-o-saamaan-e-gada-e-koo-e-Sarwar kya kahoon Un ka mangta Sarwari ke saaz-o-saamaan le chala

Do qadam bhi chal na sakte hum sar-e-shamshir-e-tez Haath pakre Rabb-e-Sallim ka nigahbaan le chala

Dastgeer-e-khasta-haalaan dastgeeri kijiye Paanv mein ra'asha hai sar par baar-e-isyaan le chala

Waqt-e-aakhir na-umeedi mein woh surat dekh kar Dil shikasta dil ke har paara mein Quran le chala

Qaidiyon ki junbish-e-abroo se beri kaat do Warna jurmon ka tasalsul su-e-zindaan le chala

Roz-e-mehshar shaad hon aasi ke pesh-e-Kibriya Rahm un ko ummati goyaan-o-giryaan le chala

Shakl-e-shabnam raaton ka rona tera abr-e-karam Subh-e-mehshar surat-e-gul hum ko khandaan le chala

Kushtagaan-e-naaz ki qismat ke sadqe jaaiye Un ko maqtal mein tamaasha-e-shaheedaan le chala

Akhtar-e-Islam chamka kufr ki zulmat chhanti Badr mein jab woh hilaal-e-tegh-e-barraan le chala

Bazm-e-khoobaan ko Khuda ne pehle dein aaraaishein Phir mere dulha ko su-e-bazm-e-khoobaan le chala

Allah Allah sarsar-e-Taiba ki rang-aameziyaan Har bagoola nazhat-e-sarv-e-gulistaan le chala

Ghamzadon ko jab shafa'at ne kiya umeed-waar Afw khushkhabri sunaata pesh-e-Yazdaan le chala

Qatra qatra un ke ghar se bahr-e-irfaan ho gaya Zarra zarra un ke dar se mehr-e-taabaan le chala

No Internet? No Problem! Get the App for Offline Lyrics!

Subh-e-mehshar har ada-e-aariz-e-roshan mein woh Shama-e-noor afshaan paye shaam-e-ghareebaan le chala

Shafe'-e-roz-e-qayamat ka hoon adna ummati Phir Hasan kya gham agar main baar-e-isyaan le chala