Maqbool Dua Karna

Maqbool dua karna manzoor sana karna Midhat ka sila dena maqbool sana karna

Dil zikr-e-shareef un ka har subh-o-masa karna Din raat japa karna har aan rata karna

Seena pe qadam rakhna dil shaad mira karna Dard-e-dil-e-muztar ki Sarkar dawa karna

Sansar bhikari hai jag daata daya karna Hai kaam tumhara hi Sarkar ata karna

Kab aap ke koocha mein mangta ko sada karna Khud bheek liye tum ko mangta ko nida karna

Din raat hai Taibah mein daulat ka luta karna Mangta ki dawa karna mangta ka bhala karna

Hum ain jafa hi hain hum ko to jafa karna Aur tum to karam hum par ae jaan-e-wafa karna

Din raat khataon par hum ko hai khata karna Aur tum ko ataon par har dam hai ata karna

Hum apni khataon par nadim bhi nahi hote Aur un ko ataon par har baar ata karna

Hum aap hi apne par karte hain sitam had bhar Aur un ko karam hum par hai had se siwa karna

Hai aath pehar jaari langar mere daata ka Har aan hai sarkari baaray ka luta karna

Mehroom nahi jis se makhlooq mein koi bhi Woh faiz unhein dena woh jud-o-sakha karna

Hai aam karam un ka apne hon ke hon aada Aata hi nahi goya Sarkar ko la karna

Mehroom gaya koi mayoos phira koi Dekha na suna un ka inkaar-o-aba karna

Mayoos gaya koi mehroom phira koi Duniya ke salateen ko kab aaya ata karna

Dukh dard kahein kis se yeh kaam to hain un ke Faryaad suna karna aur daad diya karna

Wallah woh sun lein ge aur dil ki dawa dein ge Be-kaar na jaye ga faryaad-o-baka karna

Aada ko Khuda wala jab tum ne bana dala Dushwar hai tum par kya mujh bad ka bhala karna

Sookhi hai mari kheti par jaye bharan teri Ae abr-e-karam itna to bahar-e-Khuda karna

Jo sokhta heezam ko chaho to hara kar do Mujh sokhta jaan ka bhi dil pyare hara karna

Taibah mein bula lena aur apna bana lena Qaid-e-gham-e-furqat ke Sarkar riha karna

Hum arz kiye jayen Sarkar sune jayen Kya door karam se hai din aisa shaha karna

Sang-e-dar-e-Sarwar par rakha hua ho yeh sar Ae kaash ho qismat mein is tarah qaza karna

Khul jayen chaman dil ke aur huzn mitein dil ke Taibah se saba aa ke imdaad zara karna

Har daagh mita dena aur dil ko shifa dena Aaina bana dena aisi to jala karna

Sarwar hai wohi Sarwar ae Sarwar-e-har Sarwar Hai aap ke qadmon par sar jis ko fida karna

Shehra lab-e-Isa ka jis baat mein hai Maula Tum jaan-e-Maseeha ho thokar se ada karna

Tu jaan-e-Maseeha se halat mari ja kehna Itna to karam mujh par ae baad-e-saba karna

Parda mein jo rehte ho parda hai chale aao Aankhon mein basa karna tum dil mein raha karna

Uff kaisi qayamat hai yeh roz-e-qayamat bhi Suraj hai wahin qaim bhoola hai dhala karna

No More Screenshots! Save Storage with Our Lyrics App!

Lillah hamein Maula daaman ke tale le lo Hum kaisi bala mein hain haan radd-e-bala karna

Yeh zill-e-karamat hai hum saya-e-rehmat hai Yeh saya-e-raafat hai daaman zara wa karna

Ae zill-e-Khuda saya hai aaj kahan paya Hum saye ko aaye hain tum saya zara karna

Lab tishna hai go saaqi tishna teri ru'iyat ka Ru'iyat jo na ho teri to jaam ka kya karna

Hon tishna magar saaqi deedar ke sharbat ka Ik jaam mujhe pyare lillah ata karna

Tishna mein nahi is ka tishna hoon main ru'iyat ka Saaqi mujhe Kausar ke saghar ko hai kya karna

Hai pyaas se haal abtar nikli hai zabaan baahar Ik jaam mujhe Sarwar Kausar ka ata karna

Jo dil se tujhe chahein jo aib tere dhanpein Ae nafs tujhe un se kambakht dagha karna

Woh tera bura chahein mumkin hi nahi un se Aada ki bhalai ki jin ko hai dua karna

Duniya bane ya bigre duniya rahe ya jaye Tu deen bana pyare duniya ka hai kya karna

Khaya piya aur pehna achon se raha acha Kuch deen ka bhi kar le duniya ka hai kya karna

Qismat mein gham-e-duniya jannat ka qabala ho Taqdeer mein likha ho jannat ka maza karna

Duniya mein jo rote hain uqba mein woh hanste hain Duniya mein jo hanste hain hai un ko kudha karna

Musa huye ghash jis se aur Toor jala jis se Woh jalwa mere dil par ae noor-e-Khuda karna

Barbaad na ho mitti is khaak ke putle ki Allah mujhe un ki khaak-e-kaf-e-pa karna

Kyon naqsh-e-kaf-e-pa ko dil se na lagaye woh Hai aaina-e-dil ki Noori ko jala karna