Madine Mein Bula Aye

Madinah mein bula ae rehne wale sabz gumbad ke Badon ko bhi nibha ae rehne wale sabz gumbad ke

Sunheri jaaliyon ke saamne bistar lage apna Wahin aaye qaza ae rehne wale sabz gumbad ke

Jise ushshaq ki jannat kaha karte hain ahl-e-haq Woh hai sehra tera ae rehne wale sabz gumbad ke

Gire jaate hain tere naam lewa baar-e-isyaan se Tu girton ko utha ae rehne wale sabz gumbad ke

Kinara door hai kashti shikasta aur bhanwar hail Khabar le main chala ae rehne wale sabz gumbad ke

Do aalam ki muradon ke liye kafi o wafi hai Tera dast-e-ata ae rehne wale sabz gumbad ke

Agar mil jaaye chheenta qatra-e-rehmat se aalam ko Toh ho sab ka bhala ae rehne wale sabz gumbad ke

Khulein jis se yeh murjhai hui kaliyan mere dil ki Chala aisi hawa ae rehne wale sabz gumbad ke

Raza-e-haq ke talib do jahan lekin tera Maula Teri chahe raza ae rehne wale sabz gumbad ke

Gunahgaron ki janib se khataon par khatayein hain Magar tujh se ata ae rehne wale sabz gumbad ke

Dur-e-dandan ka sadqa qabr-e-teera ko bana roshan Zara parda utha ae rehne wale sabz gumbad ke

Mah-e-be-daagh tere noor se roshan zamana hai Tu hai Badr-ud-Duja ae rehne wale sabz gumbad ke

Tu hi zahir tu hi batin tu hi hai ibtida pyare Tu hi hai intiha ae rehne wale sabz gumbad ke

Madine mein Arab mein arsh par dunya o uqba mein Teri phaili ziya ae rehne wale sabz gumbad ke

Farishton ka jhuka sar su-e-Aadam kis ke baais se Tera hi noor tha ae rehne wale sabz gumbad ke

Free Up Space - Get Lyrics Without Bulky Screenshots!

Ghata charon taraf se kufr ki Islam par chhayi Nazar farma zara ae rehne wale sabz gumbad ke

Shahanshah-e-Madinah tu hai hakim saare aalam ka Jahan tera gada ae rehne wale sabz gumbad ke

Salateen-e-jahan dete hain aakar bheek lene ko Tere dar par sada ae rehne wale sabz gumbad ke

Hazaron ko hayat-e-jawidan bakhshi toh mera bhi Dil-e-murda jala ae rehne wale sabz gumbad ke

Khila deti hai murjhai hui kaliyan ghulamon ki Madine ki hawa ae rehne wale sabz gumbad ke

Teri khushbu hai jab rehbar toh zair kis liye poochein Tere dar ka pata ae rehne wale sabz gumbad ke

Kahin bazaar-e-mehshar mein na mere aib khul jayein Tu daaman mein chupa ae rehne wale sabz gumbad ke

Woh roza jis pe hain Jibreel bhi sau jaan se qurban In aankhon se dikha ae rehne wale sabz gumbad ke

Janab-e-Nooh ne ki nakhudai ek kashti ki Tu sab ka nakhuda ae rehne wale sabz gumbad ke

Dikhaye aftab-e-hashr jab tezi ghulamon ko Tu le zer-e-liwa ae rehne wale sabz gumbad ke

Karam wale teri chashm-e-inayat ke ishare mein Huye aasi riha ae rehne wale sabz gumbad ke

Khuda hai tera wasif phir Jameel Qadri kyonkar Kare teri sana ae rehne wale sabz gumbad ke