Madine Ka Safar Hai

Madine ka safar hai aur main namdeeda namdeeda Jabeen afsurdah afsurdah qadam laghzida laghzida

Download Lyrics & Access Offline - Install Our App Now!

Chala hoon ek mujrim ki tarah main janib-e-Taiba Nazar sharminda sharminda badan larzida larzida

Kisi ke haath ne mujh ko sahara de diya warna Kahan main aur kahan ye raaste pacheeda pacheeda

Tawaf-e-koocha-e-jaanaan ke qabil kaun samjhe ga Mera ehram-e-hasti dekh kar boseeda boseeda

Kahan main aur kahan us rauza-e-aqdas ka nazara Nazar us samt uthti hai magar duzdeeda duzdeeda

Madine jaake hum samjhe taqaddus kis ko kehte hain Hawa pakeeza pakeeza fiza sanjeeda sanjeeda

Wohi Iqbalؔ jis ko naaz tha kal khush mizaji par Firaq-e-Taiba mein rehta hai ab ranjeeda ranjeeda