Kuch Aisa Kar De

Kuch aisa karde mere Kirdgar aankhon mein Hamesha naqsh rahe ruye-yaar aankhon mein

Na kaise yeh gul-o-ghunche hon khwar aankhon mein Base hue hain Madine ke khar aankhon mein

Basa hua hai koi gul-e-izhaar aankhon mein Khula hai char taraf lala-zaar aankhon mein

Hawa hai jalwa-numa gul-e-izhaar aankhon mein Khizan ke daur mein phooli bahar aankhon mein

Sarur-o-noor ho dil mein bahar aankhon mein Jo khwab mein kabhi aaye nigar aankhon mein

Woh noor de mere Parwardigar aankhon mein Ke jalwa-gar rahe rukh ki bahar aankhon mein

Nazar ho qadmon par un ke nisar aankhon mein Banayein apna hon woh rah-guzar aankhon mein

Na ek nigah hi sadqa ho dil bhi qurbaan ho Karam kare toh woh naqa-sawar aankhon mein

Basar ke sath baseerat bhi khoob roshan ho Lagaoon khaak-e-qadam baar baar aankhon mein

Tumhare qadmon pe moti nisar hone ko Hain beshumar meri ashkbar aankhon mein

Nazar na aaya qarar-e-dil-e-hazein ab tak Nigah rehti hai yun be-qarar aankhon mein

Unhein na dekha toh kis kaam ki hain yeh aankhein Ke dekhne ki hai sari bahar aankhon mein

Nazar mein kaise samayenge phool jannat ke Ke bas chuke hain Madine ke khar aankhon mein

Ajab nahin ke likha loh ka nazar aaye Jo naqsh-e-pa ka lagaoon ghubar aankhon mein

Mile jo khaak-e-qadam un ki mujh ko qismat se Lagaoon surma na phir zeenhaar aankhon mein

Madinah jaan-e-chaman aur khizan se ayman hai Lagaye khaak wahan ki hazar aankhon mein

Khule hain deedah-e-ushaaq khwab-e-marg mein bhi Ke us nigar ka hai intezar aankhon mein

Khizan ka daur hua door woh jahan aaye Hui hai qadmon se un ke bahar aankhon mein

Yeh ishtiyaq teri deed ka hai jaan-e-jahan Dam aa gaya hai dam-e-ihtizar aankhon mein

Yeh aasman ke tare yeh nargis-e-shahla Tera hi jalwa hai in beshumar aankhon mein

Yeh dam hamara koi dam ka aur mehman hai Karam se lijiye dam bhar qarar aankhon mein

Woh sabz sabz nazar aa raha hai gumbad-e-sabz Qarar aa gaya yun be-qarar aankhon mein

Bahar-e-dunya hai fani nazar na kar us par Hai koi dam ki yeh sari bahar aankhon mein

Yeh gul yeh ghunche yeh gulshan ke bel aur boote Unhein ke dam ki hai sari bahar aankhon mein

Yeh haal-e-zaar hai furqat mein tere Muztar ka Ke ashk aate hain be-ikhtiyar aankhon mein

Wahi mujhe nazar aayein jidhar nigah karoon Unhein ka jalwa rahe aashkar aankhon mein

Yeh dil tarap ke kahin aankhon mein na aa jaye Ke phir raha hai kisi ka mazaar aankhon mein

Na aise phool khule hain kabhi na aage khulein Baharon mein hai Arab ki bahar aankhon mein

Qareeb hai rag-e-gardan se par juda hai woh Na yaar dil mein makeen hai na yaar aankhon mein

Yeh qurb aur yeh doori Khuda ki qudrat hai Ke hoga khuld mein deedar-e-yaar aankhon mein

Karam yeh mujh pe kiya hai mere tasawwur ne Ke aaj kheench di tasveer-e-yaar aankhon mein

Farishto poochte ho mujh se kis ki ummat ho Lo dekh lo yeh hai tasveer-e-yaar aankhon mein

Na sirf aankhein hi roshan hon dil bhi beena ho Agar woh aayein kabhi ek baar aankhon mein

Hazar aankhein hain taron ki ik gul-e-mahtab Yeh ek phool hai jaise hazar aankhon mein

Yun hi hain mah-e-risalat bhi sab nabiyon mein Karor aankhon nahin beshumar aankhon mein

Yeh kya sawal hai mujh se ke kis ka banda hai Main jis ka banda hoon hai noor-bar aankhon mein

Hai aashkar nazar mein jahan ki nairangi Jama hai naqsha-e-lail-o-nahar aankhon mein

Free Up Space - Get Lyrics Without Bulky Screenshots!

Jama hua hai tasawwur mein rauda-e-wala Base hue hain woh lail-o-nahar aankhon mein

Nahar chehra-e-wala toh gesu hain wal-layl Baham hue hain yeh lail-o-nahar aankhon mein

Piya hai jaam-e-mohabbat jo aap ne Noori Hamesha us ka rahe ga khumar aankhon mein