Kon Ho Masnad Nasheen

Kaun ho masnad-nasheen khaak-e-Madinah chhor kar Khuld dekhe kaun, koo-e-Shah-e-Bat-ha chhor kar

Dil ki basti aur armaanon ki dunya chhor kar Haaye kyun laute thay hum shehr-e-Madinah chhor kar

Ghar se pohnche un ke roze par toh hum ko yun laga Jaise aa nikle koi gulshan mein, sehra chhor kar

Kaun nazron par charhe husn-e-haqeeqat ke siwa Kis ka munh dekhein hum un ka ro-e-zaiba chhor kar

Allah Allah aamad-e-Sultan-e-ins-o-jaan ki shaan Ek taraf qudsi bhi ho jaate thay, rasta chhor kar

Mustafa jannat mein jaayenge na ummat ke baghair Ja nahi sakta kabhi tunkon ko darya chhor kar

Thi na chahat dil mein Zahra ke dularon ki agar Kyun utarte thay Nabi, mimbar se khutba chhor kar

Rahrawan-e-rah-e-haq thay aur bhi lakhon, magar Koi manzil par na pohancha ibn-e-Zahra chhor kar

Un sahaba ke is andaaz-e-qana'at par salam Un ki chaukhat par jo aa baithe thay, kya kya chhor kar

Woh azal se mere Aaqa, mein ghulam ibn-e-ghulam Kyun kisi ke dar pe jaaun un ka sadqa chhor kar

Khwan-e-shahi ki hawas rakhte nahi un ke gada Kyun udhar lapkein, woh un tukron ka chaska chhor kar

Offline Lyrics Anytime, Anywhere - Download the App Today!

Woh salamat aur un ka dar salamat ta-abad Kyun phirein dar dar, hum is kooche ka phera chhor kar

Main kahan ghoomun, kahan thahroon, kise dekha karoon Un ki galiyan, un ki jaali, un ka roza chhor kar

Ittifaqan gar chale jaate woh saahil par kabhi Machhliyan aatein qadam lene ko, darya chhor kar

Zehan mein rakhiye woh irshad-e-Nabi waqt-e-wisaal Ja raha hoon sunnat-o-Quran ko yakja chhor kar

Ae Musalman! hai yahi hukm-e-Khuda-o-Mustafa Fikr-e-uqba kar hamesha, fikr-e-dunya chhor kar

Poochhne phir kaun aayega Naseer un ke siwa Jis lahad mein tujh ko sab lautenge tanha chhor kar