Karam Jo Aap Ka Aye

Karam jo aap ka ae Sayyid-e-Abrar ho jaaye To har badkar banda dam mein nekokar ho jaaye Jo momin dekhe tum ko mehram-e-asrar ho jaaye Jo kafir dekh le tum ko to woh deendar ho jaaye Jo sar rakh de tumhare qadmon pe sardar ho jaaye Jo tum se sar koi phere zaleel-o-khwar ho jaaye Jo ho jaaye tumhara us pe Haq ka pyaar ho jaaye Bane Allah wala woh jo tera yaar ho jaaye Agar aaye woh jaan-e-noor mere khana-e-dil mein Mah-o-khawar mera ghar matla-e-anwar ho jaaye Gham-o-ranj-o-alam aur sab balaon ka madawa ho Agar woh gesuon wala mera dildaar ho jaaye Inayat se mere sar par agar woh kafsh-e-pa rakh dein Yeh banda tajdaron ka bhi to sardar ho jaaye Talatum kaisa hi kuch hai magar ae nakhuda-e-man Ishara aap farma dein to beda paar ho jaaye Jo dooba chahta hai woh to hai dooba hua beda Ishara aap ka paaye to Maula paar ho jaaye Tumhare faiz se lathi misal-e-shama roshan ho Jo tum lakri ko chaho teztar talwar ho jaaye Gunah kitne hi aur kaise hi hain par rahmat-e-alam Shafa’at aap farmayein to beda paar ho jaaye Bharam reh jaaye mehshar mein na palla halka ho apna Ilahi mere palle par mera gham khwar ho jaaye Ishara paaye to dooba hua suraj baramad ho Uthay ungli to mah do balkay do do chaar ho jaaye Tera tasdeeq karne wala hai Allah ka momin Tera munkir woh jis ko Haq se hi inkar ho jaaye Mere saqi may-e-baqi pila de ek alam ko Jo baqi aur pyasa hai tera may-khwar ho jaaye Tumhare hukm ka bandha hua suraj phire ulta Jo tum chaho ke shab din ho abhi Sarkar ho jaaye Qawafi aur mazameen achay achay hain abhi baqi Magar bas bhi karo Noori na parhna baar ho jaaye

Your Lyrics, Even Offline - Install the App for Free!