Jo Sidq e Dil Se

جو صدقِ دل سے تمہارا غلام ہوجائے تو اس پہ آتشِ دوزخ حرام ہوجائے

نزولِ رحمتِ حق بھی اسی طرف کو ہو جدھر وہ سروَرِ عالی مقام ہوجائے

الٰہی جس کے سبب سے یہ عرش و فرش بنے اُسی کا میرے بھی دِل میں قیام ہوجائے

خدا کرے کہ مَدینے کا ہو سفر ہر سال ہماری عمر اِسی میں تمام ہوجائے

تمہارے روضۂ اَقدس پہ میرا دم نکلے فراق و وَصل کا قصہ تمام ہوجائے

نہ کیوں ہو مجھ کو مقدر پہ اپنے ناز اگر سگانِ طیبہ میں میرا بھی نام ہوجائے

نظر سے دُور ہو اِک پَل اگر جمالِ حضور مریضِ عشق کو جینا حرام ہوجائے

یہ کہہ رہا ہے فَتَرْضٰی کہ غیر ممکن ہے خلافِ مرضیِ محبوب کام ہوجائے

اَدب سے شرم سے منہ ڈَھانک لے کرے سجدہ جو سامنے کبھی ماہِ تمام ہوجائے

شکار مجھ کو نہ کر نفس ہوں غلامِ حضور نہ ٹکڑے ٹکڑے کہیں تیرا دام ہوجائے

جمیلؔ قادری رضوی کا خاتمہ بالخیر طفیلِ حضرتِ خیرالانام ہوجائے