Jo Dagh e Ishq

Jo daagh-e-ishq-e-Shah-e-Deen hain dil pe khaaye hue Woh goya Khuld-e-Bareen ki sanad hain paaye hue

Tumhaare dar ke gadaaon ke waaste ya Shah Bahisht laaye hain Rizwaan dulhan banaaye hue

Utha ke aankh na dekhe woh hoor-o-ghilmaan ko Nazar mein jis ki hain Maah-e-Arab samaaye hue

Hai aashiqon ki nazar tere rukh pe baatin mein Bazahir apna kafan mein hain munh chhupaaye hue

Hai un ke dafn pe qurbaan jaan-e-aalam ki Jo tere haath se hain qabr mein sulaaye hue

Thehar zara Malak-ul-Maut dekh lene de Shah-e-Madinah hain baaleen pe meri aaye hue

Ajal hai sar pe khari der kar na ae ghaafil Rah-e-Madinah ko tay kar qadam barhaaye hue

Na jaayenge kahin hil kar is aastaane se Ke hum hain ya Shah-e-Taiba tere hilaaye hue

Woh din naseeb ho haathon mein jaaliyaan thaame Kharay hon hum tere rozay pe sar jhukaaye hue

Farishtay karte hain yun zaairon ka istiqbaal Ke yeh Habeeb-e-Mukarram ke hain bulaaye hue

Kuch ek hum hi nahi hain dar-e-Nabi ke gada Qamar bhi daagh-e-ghulaami hai dil pe khaaye hue

Khuda ne un ko kiya sar-buland aalam mein Tere huzoor mein aaye jo sar jhukaaye hue

Falak pe Arsh pe jannat mein tera ism-e-shareef Khuda ne naam se apne likha milaaye hue

Gulaab balkay sabhi phool Ya RasoolAllah Tere paseenay ki khushbu mein hain basaaye hue

Bahisht-o-khuld hain kya balkay kul khazaanon ka Khuda ke ghar se hain woh ikhtiyaar paaye hue

Ajab hai kya jo khulay un pe ghaib ke asraar Khuda ke hain woh sikhaaye hue parhaaye hue

Suna hai jab se ke Yu’teeka Rabbuka Tarda Tumhaari ummat-e-aasi ke dil sawaaye hue

Tera karam ke tu farmaye ummati har dam Hamara zulm ke hum hain tujhe bhulaaye hue

Zahay naseeb ke ummat ki maghfirat ke liye Woh hain Janaab-e-Ilahi mein haath uthaaye hue

Ghulaam un ke giraftaar kyun hon mehshar mein Woh sab ko daaman-e-aqdas mein hain chhupaaye hue

Agarcha nek amal kuch nahi hamaare paas Magar Huzoor ka hain aasra lagaaye hue

Siwa Huzoor ke koi nahi rafeeq apna Azeez jin ko samajhte thay woh paraaye hue

Free Up Space - Get Lyrics Without Bulky Screenshots!

Kuch is mein shak nahi bad hain gunaahgaar hain hum Magar badon ko bhi rakho Shaha nibhaaye hue

Huzoor hashr mein bigri gunaahgaaron ki Banay gi kaise baghair aap ke banaaye hue

Safeed naama-e-aamaal kyun na hon un ke Tere karam ki jo baarish mein hain nahaaye hue

Nida yeh hashr mein hogi ke dekh lein ush-shaq Niqaab woh rukh-e-anwar se hain uthaaye hue

Hai munkiron ke liye roz-e-hashr naar-e-jaheem Qusoor-e-khuld ghulaamon pe hain lutaaye hue

Madad karo ke tumhaare ghulaam ke peeche Hai dushmanon ka hujoom aasteen charhaaye hue

Jameel Qadri naat-e-Nabi sunaayenge Khuda ke saamne jaayenge jab bulaaye hue

Jameel Qadri chamke na kyun kalaam tera Ke tu Janaab-e-Raza se hai faiz paaye hue